Nýtt afbrigði kórónuveirunnar hefur greinst í New York í Bandaríkjunum og veldur það vísindamönnum og heilbrigðisstarfsmönnum áhyggjum.
New York Times greinir frá þessu og segir að vísbendingar séu uppi um að þau bóluefni sem eru í notkun gegn veirunni veiti ekki jafn góða vörn gegn þessu stökkbreytta afbrigði og öðrum eldri afbrigðum veirunnar. Tveir hópar vísindamanna hafa rannsakað þetta.
Í umfjöllun blaðsins kemur fram að þetta nýja afbrigði, sem kallast B.1.526, hafi fyrst greinst í borginni í nóvember síðastliðnum en undanfarna daga hafi það í raun náð yfirhöndinni. Um miðjan febrúarmánuð mátti rekja eitt af hverjum fjórum smitum til þess.
Bent er á það að vísindamenn við Caltech annars vegar og Columbia University hins vegar hafi gert rannsóknir á stökkbreyttri veirunni og bráðabirgðaniðurstöður valdi ákveðnum áhyggjum. Tekið er fram að niðurstöðurnar hafi ekki verið birtar í ritrýndu tímariti og því beri að taka þeim með ákveðnum fyrirvara.
„Þetta eru ekki sérstakar gleðifréttir. En samt sem áður er gott að vita af þessu því þá getum við hugsanlega brugðist við,“ hefur New York Times eftir Michel Nussenzweig, sérfræðingi í ónæmisfræði við Rockefellar-háskólann.
Vísindamenn eru viðbúnir því að glíma við stökkbreytingar veirunnar og hefur til dæmis verið talað um brasilísku og suðurafrísku afbrigði veirunnar í því samhengi undanfarnar vikur. Rúna Hauksdóttir, forstjóri Lyfjastofnunar, sagði í fréttum RÚV fyrr í þessum mánuði að veiran væri að stökkbreyta sér og ekki sé ólíklegt að fólk þurfi hugsanlega að fara í bólusetningu aftur, með einhverju bústi, eftir til dæmis tvö ár.
„En það er bara mjög gott og ánægjulegt að það eru margir framleiðendur, mismunandi tækni sem er að koma fram þannig að það býður upp á alls konar möguleika í að fínstilla þetta,“ sagði hún.
