„Mér hefur fundist erfitt að horfa upp á það sem mér finnst vera stjórnlaust undanhald þjóðkirkjunnar í íslensku samfélagi,“ sagði Kristrún Heimisdóttir lögfræðingur í framboðsræðu áður en hún var kjörin fyrsti varaforseti kirkjuþings þjóðkirkjunnar um liðna helgi.
Fréttablaðið greinir frá þessu í morgun.
Kristrún sem kvaðst á kirkjuþinginu hafa hlotið kristilegt uppeldi boðaði sókn þjóðkirkjunnar. „Á síðustu misserum og árum hefur það lagst sífellt meira á minn hug að þjóðkirkjan á Íslandi sé lykilatriði í því samfélagi sem ég ólst upp í og sem ég vil að afkomendur mínir og Íslendingar framtíðarinnar geti notið,“ sagði hún. Þess vegna vildi hún berjast gegn áðurnefndu undanhaldi kirkjunnar.
„Ég tel að kirkjan eigi mikið af sóknarfærum og að við verðum að þora að taka umræðuna,“ sagði Kristrún. „Ég er reiðubúin að taka slagi fyrir kirkjuna og mér er alveg sama þótt mér verði úthúðað á samfélagsmiðlum á meðan ég geri það.“
Kristrún kvaðst í starfi sínu innan Stjórnarráðsins hafa fylgst með lagasetningu um trúfélög. „Lögin um trúfélög eru að mínu mat bastarður og Zúistahneykslið segir allt sem segja þarf um það hversu slæm þau lög eru,“ sagði hún og bætti við að alltaf þegar hún gæfi fermingarbörnum gjafir léti hún fylgja þau orð að besti áhrifavaldurinn sé Jesús Kristur. „Og hvers vegna er búið að banna öllum börnum á Íslandi að hafa aðgang að þeim áhrifavaldi? En öll mega þau horfa á TikTok?“
Kristrún fékk átján atkvæði en mótframbjóðandi hennar, Steindór Haraldsson framkvæmdastjóri, tíu.
„Við erum að fóta okkur í nýju umhverfi. Þannig að það er ekki alveg rétt að það hafi ekkert verið gert hérna,“ sagði Steindór í sinni ræðu. Markmið kirkjunnar væri að boða fagnaðarerindi Jesú Krists. „Þjóðkirkjan er eins og olíuskip sem ekki verður beygt á nóinu.“
