Ný tegund af Royal búðingi mun birtast í verslunum á næstu dögum en um er að ræða tegund sem aðeins verður framleidd í takmörkuðu magni.
Roayl-búðingurinn á sér fjölmarga fylgjendur hér á landi en bragð nýju tegundarinnar er bananasplitt með hvítu súkkulaði.
„Royal búðingur hefur á síðustu árum orðið sífellt vinsælli í bakstur og sem fylling og var nýja tegundin þróuð með það í huga auk þess að vera ljúffengur eftirréttur fyrir alla fjölskylduna. Nýja tegundin kemur einmitt í tæka tíð fyrir bolludaginn og mælum við með að blanda 4 dl af köldum rjóma við innihald pakkans til að gera dásamlega bananasplittfyllingu í bollurnar. Íslendingar hafa sýnt og sannað að þeir eru mjög hugmyndaríkir þegar kemur að Royal búðingi og hafa margir búið til sína eigin fullkomnu blöndu,“ segir í tilkynningu.
Royal búðingur hefur verið framleiddur á Íslandi í 67 ár og á sér djúpar rætur í íslenskri matarhefð. Framleiðandi hefur alla tíð verið Agnar Ludvigsson ehf.
