Bjartmar Leósson, sem gengið hefur undir nafninu Hjólahvíslarinn, leitar nú logandi ljós að hjólinu sínu sem búið er að stela. Bjartmar hefur verið manna duglegastur hér á landi við að hafa upp á stolnum hjólum og hefur hann endurheimt hjól fyrir milljónir króna.
En nú hefur Bjartmar sjálfur orðið fyrir barðinu á hjólaþjófnaði, eins og fram kemur í færslu sem hann birti í Facebook-hópnum Hjóladót tapað, fundið eða stolið.
„Þá er búið að stela mínu hjóli. Úr anddyri hússins sem ég bý í. Gaf U lásinn minn um daginn og hef ekki komist í að kaupa nýjan. En það er líka læst með áföstum lás. Hvað segiði, mynduð þið deila þessu fyrir mig?,“ segir Bjartmar sem var síðast í viðtali í morgun í Morgunútvarpinu á Rás 2 þar sem hann lýsti baráttu sinni gegn reiðhjólaþjófum.
