„Lögreglan á höfuðborgarsvæðinu varar fólk sérstaklega við svikum sem eru að eiga sér stað um þessar mundir á netinu og í gegnum síma. Alþjóðalögreglan (INTERPOL) og Alþjóða heilbrigðisstofnunin (WHO) hafa einnig tilkynnt um svik sem eru að eiga sér stað út um allan heim.“
Þetta kemur fram í tilkynningu frá lögreglunni á höfuðborgarsvæðinu. Þar kemur einnig fram að ódámarnir sem þetta stunda geri það með því að setja upp svikasíður eða hringja í fólk. Reyna þeir að blekkja fólk til að gefa upp upplýsingar eða greiða fyrir vörur sem ekki eru til.
„Í tengslum við Covid-19 er verið að reyna að svindla á fólki með vörur sem mikil eftirspurn er eftir. Þetta eru þá vörur eins og öndunarmaskar, handspritt o.fl. í þeim dúr.“
Fólk er beðið um að vera á varðbergi vegna slíkra blekkinga og svika, en nú þegar hefur verið tilkynnt um slíkar blekkingar hér á landi. Þetta á t.d. við um Instagramsíðu þar sem fólk var blekkt að Landlæknisembættið væri að hafa samband gegnum þá síðu. Þá segir að lokum:
„Rakningarteymi almannavarna er að hafa samband við fólk um þessar mundir vegna Covid-19 veirunnar, en fólk á að hafa í huga að það er aldrei spurt um lykilorð, notendanöfn eða greiðsluupplýsingar í þeim samtölum.“
