Nítján kórónuveirusmit greindust hér á landi í gær og hafa ekki fleiri smit greinst á einum degi síðan þann 9. Apríl síðastliðinn þegar 26 smit greindust. Þetta kom fram í máli Thors Aspelund, prófessors í líftölfræði við Háskóla Íslands, í Morgunútvarpinu á Rás 2 í morgun.
Ekki liggur fyrir hversu margir þeirra sem smituðust voru í sóttkví en í gær var greint frá því að þrettán smit hefðu greinst, en þar af voru tólf einstaklingar ekki í sóttkví. Samkvæmt þessu virðist faraldurinn heldur vera að ná sér á strik hér á landi.
Staðfestar tölur verða birtar klukkan 11 og mun þá liggja fyrir hversu margir voru í sóttkví.
Thor sagði að ef faraldurinn væri í eðlilegum gangi þá hefði hann búist við færri smitum. Hann hefði verið rólegur ef átta eða níu smit hefðu greinst en ekki nítján eins og í gær. „Þá er eitthvað á seyði,“ sagði hann og lýsti áhyggjum sínum af stöðunni.
