Net­glæpum fjölgar: Ís­land engin undan­tekning – Svona fara þeir að því að svíkja fé af fólki

Lög­reglan á höfuð­borgar­svæðinu hvetur fólk til að vera á varð­bergi þar sem aukning hefur orðið á net­glæpum, bæði hér á landi og er­lendis. Að sögn lög­reglu hafa borist fleiri til­kynningar um net­glæpi en venju­lega.

Lög­regla sagði í færslu á Face­book í dag að flest þessara svindla væru af eftir­farandi þremur gerðum: Fjár­festa­svindl, lof­orð um peninga og hótanir.

„Ein á­stæðan sem liggur að baki er Co­vid far­aldurinn. Hann hefur valdið mörgu fólki þungum fjár­hags­á­hyggjum og því verður það við­kvæmara fyrir slíkum gylli­boðum og getur átt á hættu að missa allt sem það á,“ segir í færslu lög­reglu.

Í hinum svo­kölluðu fjár­festa­svindlum þá koma upp aug­lýsingar, oft á Face­book eða öðrum viður­kenndum sam­fé­lags­miðlum, þar sem fólki er boðið að taka þátt í frá­bærum fjár­mögnunar­tæki­færum, oft á sviði raf­mynta eins og Bitcoin og fólk þekkir lítið til.

Stela myndum og búa til fölsk viðtöl

„Glæpa­mennirnir veigra sér ekki við að nota fræga ein­stak­linga til að ljá lygi sinni trú­verðug­leika. Þeir stela myndum af frægu fólki og búa til fölsk við­töl til að grípa fólk í gildruna. Síðan vilja þeir ólmir fá síma­sam­band því þá geta þeir beitt öllum sínum sann­færingar­brellum. Þeir hvetja til að fólk fjár­festi litlu til að „byrja með“ en síðan gera þeir allt til að ná meiri og meiri peningum. Fólk stendur í þeirri trú að það sé að fjár­festa en engin raun­veru­leg fjár­festing liggur að baki.“

Að sögn lög­reglu eru glæpa­mennirnir hrein­lega að stela peningum og ekki að á­vaxta eitt eða neitt. „Þeir senda samt alls kyns skjöl og stað­festingar með smáu letri en það er merkingar­laust og er ein­göngu til að ljá lyginni trú­verðug­leika.“

Þá segir að lof­orð um peninga sé eitt elsta form svona svindla. Þau eru í raun fram­þróun frá Nígeríu­bréfum frá meintum prinsum héðan og þaðan.

„Þetta geta verið lof­orð um arf, vinning frá fyrir­tæki, lán á frá­bærum kjörum eða á­líka. Þetta getur verið afar mis­vandað en reynir að fanga fólk í svika­myllur. Lof­orð um stórar upp­hæðir en fyrst þarf fólk að reiða fram ýmsar greiðslur, stimpil­gjöld, fyrir­fram­greiddan skatt og annað því um líkt.“

Senda grimma tölvupósta

Lög­regla hefur einnig séð aukningu í hótunum þó það tengist ekki endi­lega Co­vid-far­aldrinum. Al­gengast formið er að fólk fái tölvu­póst þess efnis að hakkari sé búinn að taka yfir tölvuna og hafi skráð alla notkun og ætli að deila með vinum við­komandi klámi eða öðru sem þeir segjast hafa séð við­komandi nota.

„Texti þessara tölvu­pósta er grimmur og getur komið fólki í ó­jafn­vægi og miðar að því að fá fólk til að greiða í óða­goti. Nær alltaf er þetta innan­tóm hótun, enginn hefur tekið yfir tölvuna heldur er þetta al­mennt orðaður fjöl­póstur sem er sendur á mjög stóran hóp í þeirri von um að ein­hverjir greiði. Það kemur fyrir að þeir hafa með gamalt lykil­orð sem þeir hafa komist yfir eða að pósturinn sé látinn líta út­fyrir að koma úr tölvu­pósti brota­þola. Það er samt að­eins smá tölvu­kunn­átta þar sem skeytar­upp­lýsingum er breytt og þetta er látið líta út fyrir að koma úr póst­fangi við­komandi en á í raun annan upp­runa. Lykil­orðin fá þeir úr gagna­lekum og fá þá einnig net­fang með.

Dæmi um texta í hótunar­pósti:

„It seems that XXXXXXXXX is your password. You do not kow me and you’re proba­bly thinking why you are getting this mail, cor­rect?

In fact, I actu­ally placed a malware on the adult vids (pornograp­hic materials) website and guess what, you visited this website to have fun (you know what I mean). While you were watching videos, your inter­net brow­ser initi­a­ted operating as a RDP (re­mot­e Desktop) with a key log­ger which gave me accessi­bility to your dis­play scree as well as cam. Just after that, m software gat­hered all you contacts from you Mess­en­ger, FB, as well as ema­il.“

Aldrei senda peninga

Lög­regla brýnir fyrir fólki að senda aldrei peninga því þá verða glæpa­mennirnir á­gengari og á­gengari enda er aldrei á­stæða til að treysta neinu sem þeir segja.

„Þá getur fólk skoðað hvort að ein­hver sé með net­föng þeirra og lykil­orð á síðum eins og https://ha­vei­been­pwne­d.com/ Vegna þess á­stands sem skapast vegna Co­vid þá eru þessir svindlarar að spila inn á á­hyggjur og við­kvæma stöðu fólks í heiminum og Ís­land er engin undan­tekning. Glæpa­mennirnir eru stöðugt að þróa að­ferðir sínar og þetta er ekki tæmandi talning. Við hvetjum fólk til að vera á varð­bergi og ekki senda neinum peninga sem þau vita ekki hver er. Ef þið teljið ykkur vera þolanda net­glæpa eða að þið fáið svona pósta þá endi­lega verið í sam­bandi við okkur á [email protected], á Face­book síðu lög­reglu eða á [email protected].