Lögreglan í Östersund í Svíþjóð rannsakar nú hvort hópur menntaskólanemenda hafi reynt að smitast af COVID-19-veirunni til að geta svo dreift henni enn frekar.
Sænski fréttamiðillinn SVT segir frá þessu, en í frétt miðilsins kemur fram að nemendur séu grunaðir um að hafa reynt að hafa upp á COVID-19-smituðum einstaklingum til að smitast sjálfir. Markmiðið hafi svo verið að dreifa veirunni enn frekar. Er markmiðið að ná fram ónæmi fyrir næsta vor, að því er segir í frétt SVT.
Tekið er fram í fréttinni að aðeins sé um grun að ræða og engir nemendur liggi beinlínis undir grun. Málið verði þó rannsakað af lögreglunni í þessari viku.
Monica Sandström, rektor Jämtlands Gymnasium í Östersund, segir við SVT að hún viti ekki til þess að einhver hafi vísvitandi reynt að veikjast. Á hinn bóginn viti hún til þess að nemendur séu þreyttir og einhverjir haft á orði að kannski væri best að næla sér í mótefni. Það hafi þó trúlega meira verið meint í gríni en fullri alvöru.
Þá segir Monica að nemendur séu mjög meðvitaðir um hættuna sem af veirunni stafar og mikilvægi þess að hefta útbreiðslu hennar eins og kostur er. Ef rétt reynist sé um mjög óábyrga hegðun að ræða.
Mynd:
