Nanna Rögnvaldardóttir, matreiðslubókarhöfundur, hefur ekki farið úr húsi frá 12. mars og ekki er útlit fyrir að það muni breytast á næstu dögum. Nanna er í viðtali í sunnudagsblaði Morgunblaðsins þar sem hún segist vera í sjálfskipaðri einangrun vegna COVID-19 faraldursins.
„Ég er með undirliggjandi kvilla og orðin það roskin að ég er í áhættuhópi,“ segir Nanna í viðtalinu. Hún segir að myndir af gjörgæsludeildum á Ítalíu hafi ráðið úrslitum um þessa ákvörðun hennar. Hún hafi ekki viljað hafa það á samviskunni að taka pláss frá öðrum ef mögulegt væri að komast hjá því.
Nanna hefur ekki eytt krónu í mat undanfarnar fimm vikur og þess í stað þess hefur hún nýtt það sem er til í skápunum. Hún segir að þetta hafi gengið vel og hún hafi fundið ótrúlegustu hluti í skápunum sem hún var búin að gleyma að hún ætti.
Nanna er þekkt fyrir matreiðslubækur sínar og hugmyndaflugið er svo sannarlega til staðar þegar kemur að uppskriftum. Í viðtalinu segir Nanna að hún sjái fyrir sér að vera í einangrun til 4. maí næstkomandi en hún veit ekki hvort hún haldi það út að eyða ekki krónu í mat.
Nokkuð hefur gengið á birgðir að undanförnu; síðasta eggið kláraðist á dögunum og þá er hún uppiskroppa með mjólk og grænmeti. Hún á enn dálítið kaffi sem hún fann í frystinum og meðan svo er ætti hún að vera í góðum málum.
Hún segist vita upp á hár hvað hún ætlar að kaupa þegar hún loksins ákveður að kaupa í matinn.
„Það fyrsta sem ég ætla að kaupa er nýr fiskur. Ég borða yfirleitt mikið af fiski og kaupi hann alltaf nýjan,“ segir hún við Morgunblaðið.
