Í frétt sem birtist í Fréttablaðinu í dag er rætt við einstaklinga sem nánir eru Einari Þorsteinssyni, oddvita Framsóknarflokksins í Reykjavík og framtíðar borgarstjóra. Rætt er við Halldór Þorsteinsson, yngri bróðir Einars, Sunnu Valgerðardóttur, fyrrum samstarfskonu á RÚV og Skapta Örn Ólafsson, vin frá háskólaárunum.
„Hann hefur alltaf verið mér mikil fyrirmynd og ég litið upp til hans,“ segir Halldór í samtali við Fréttablaðið.
Skapti Örn Ólafsson segir Einar alltaf hafa verið forystumann og að hann marki alls staðar spor þar sem hann er. Þeir kynntust í stjórnmálafræðinni upp úr aldamótum og eru vinir enn í dag.
Sunna Valgerðardóttir segir einar vera þrjóskan. „Ég held ég geti sagt að hann sé fylginn sér, er það ekki fallegt orðalag yfir að vera þrjóskur?“ segir Sunna. Hún segir hann elska að taka þátt í keppnum, „hvort sem það er spurningakeppni, búningakeppni eða jólaskreytingakeppni og hann er með mikið og óþolandi keppnisskap,“ segir Sunna.
„Hann er ofsalega tapsár og er virkilega pirrandi sem slíkur en er enn verri þegar hann vinnur. Sem er slæmt því hann vinnur eiginlega alltaf,“ segir Sunna. Skapti er á sama máli og Sunna og segir, „Við höfum att kappi í ýmsu og spiluðum golf lengi og hann er vonlaus kylfingur. Við spiluðum líka billiard og það er alltaf keppni.“
