Það var þungt hljóð í fundargestum á upplýsingafundi almannavarna í dag vegna stöðu Covid-faraldursins, einkum vegna álagsins á heilbrigðiskerfið. Víðir Reynisson, yfirlögregluþjónn almannavarna, var ómyrkur í máli.
Í gær greindust í það minnsta 151 Covid-smit innanlands, næst mesti fjöldi frá upphafi faraldursins. Þann 30. júlí voru greind 154 smit.
„Það þyngist heldur staðan, hraður vöxtur þessarar bylgju og dreifing smita um allt land er ný reynsla fyrir okkur, sem betur fer eru bólusetningar að verja okkur að hluta þannig að hlutfall þeirra sem veikjast alvarlega er lægra en áður, það er hins vegar til lítils að horfa til prósentuhlutfalls þegar við erum að tala um líf og heilsu einstaklinga, með auknum fjölda smita fjölgar þeim einstaklingum sem verða alvarlega veikir og þurfa aðstoð með tilheyrandi álagi, við færumst nær þolmörkum ýmissa kerfa,“ sagði Víðir.
Kamilla S. Jósefsdóttir, staðgengill sóttvarnalæknis, sagði á fundinum að ljóst væri ef að fram færi sem horfir gætu kerfi sem þjóðin reiðir sig á bresta.
Nú eru 18 inniliggjandi á Landspítala með Covid-19, þar af þrír á gjörgæslu en tveir þeirra voru lagðir inn í gær. Enginn er þó í öndunarvél. Páll Matthíasson, forstjóri Landspítalans, sagði ástandið þar erfitt.
„Við glímum við erfiðleika við að manna gjörgæslurýmin hjá okkur og við erum búin að fylla A7, smitsjúkdómadeildina, af fólki með Covid-19 og þurfum næst að opna A6, lungnadeildina, það er torvelt því það þarf að útskrifa og færa til annað fólk, það reynist áskorun,“ sagði Páll. „Við megum gera ráð fyrir auknu álagi en hversu miklu er ekki alveg ljóst.“
„Það má lítið gefa á til þess að það fari að flæða yfir,“ sagði hann enn fremur og starfsfólk spítalans væri gríðarlega þreytt enda mikið á því mætt í faraldrinum. Gripið hafi verið til ýmissa aðgerða til að mæta álaginu sem faraldrinum fylgi en gera þyrfti meira til að mæta því álagi. Efla þyrfti heilbrigðiskerfið svo það sé ekki „alltaf einni faraldursbylgju eða rútuslysi frá því að fara á hliðina.“
