Tæplega 25 þúsund einstaklingar hafa skrifað undir áskorun til stjórnvalda um að leiðrétta breytingu á aldursmörkum kvenna sem boðaðar eru í brjóstakrabbameinsskimun. Um áramótin hækkuðu aldursmörkin úr 40 ára í 50 ára.
Undirskriftasöfnunin hófst í gær og hefur fengið byr undir báða vængi. Forsprakki undirskriftasöfnunarinnar, Jónína Sævarsdóttir, sagði í samtali við Fréttablaðið að breytingar á aldursmörkum ógnuðu lífi fjölda kvenna.
„Ég tel að þetta sparnaðarráð verði hár fórnarkostnaður fyrir þær konur sem munu greinast of seint vegna nýju reglnanna.“
Þvert á móti ráðleggingum
Ákvörðun um breyttan skimunaraldur var þar að auki tekin án tillits til niðurstöðu sérstaks fagráðs um brjóstakrabbamein.
Fagráðið taldi að fara ætti að ráðleggingum Evrópusambandsins og hefja skimun við 45 ára aldur og fram til 74 ára. Skimunarráð fyrir krabbameinum á Íslandi taldi hins vegar ekki næg rök fyrir því.
Frá 2015-2019 greindust árlega að meðaltali 31 brjóstakrabbamein hjá konum á aldrinum 40-49 ára. Um 50 konur deyja vegna brjóstakrabbameins á hverju ári á Íslandi.
Hægt er skrifa undir listann hér.
