Fjallað var um köfunaraðgerðir í kjölfar flugslyssins, sem átti sér stað á Þingvallavatni í febrúar á þessu ári, á ráðstefnunni Björgun 2022, sem fram fór í Hörpu á föstudagskvöld. Þetta kemur fram í fréttFréttablaðsins.
Þar var meðal annars sýnt myndband af því þegar kafað var eftir flaki vélarinnar, og það sótt upp á land.
Ásgeir Guðjónsson, fagstjóri köfunar hjá Landhelgisgæslunni, Samúel A.W. Ólafsson, hópstjóri kafara hjá Ríkislögreglustjóra, og Guðjón S. Guðjónsson, aðstoðarvarðstjóri hjá slökkviliðinu, fjölluðu um köfunaraðgerðirnar í fyrirlestri á föstudag.
Fjórir létust í flugslysinu, sem átti sér stað þann þriðja febrúar á þessu ári. Það var ekki fyrr en þann 22. apríl sem flak vélarinnar kom á land, en það var eftir miklar og krefjandi aðgerðir kafaranna, sem þurftu meðal annars að glíma við erfiðar veðuraðstæður.
Aðgerðirnar snerust í fyrstu um að leita vélarinnar þegar lá fyrir að hún væri í Þingvallavatni. Fjölbreytt verkfæri voru notuð við þá leit, líkt og fjarstýrðar myndavélar og forritaðir kafbátar, sem skiluðu 115 þúsund á ljósmyndum. Með því að fara yfir allar þær myndir var hægt að staðsetja vélina.
Næst var að kafa að vélinni, til að staðfesta að um rétta vél væri að ræða, sem var nauðsynlegt þrátt fyrir að litlar líkur væri á að um vitlausa vél væri að ræða. Við þá köfun kom í ljós að fólkið væri ekki í flakinu.
Að finna einstaklingana var sett í forgang og fundust lík þeirra á botni vatnsins. Þann sjötta febrúar gerðu kafararnir tilraun til að sækja einstaklingana, en það var ekki hægt vegna veðuraðstæðna. Lofthiti var mínus þrettán gráður og vatnið var við frostmark.
Vegna veðursins gafst tími til að skipuleggja næstu aðgerðir. Gerð var önnur tilraun til að kafa eftir einstaklingunum. Það var í logni, en í miklu frosti og því aftur hætt við. Að lokum voru þeir sóttir með griparmi.
Þá var fjallað um aðgerðirnar þann 22. apríl, þegar vélinn var hífð upp. Kafararnir þurftu að vinna í erfðum aðstæðum og í þröngum tímaramma, en vélin var á 45 metra dýpi og vatnið við frostmark. Kafararnir höfðu örfáar mínútur til að kafa niður og festa vélina svo hægt væri að hífa hana upp.
Mikill þrýstingur myndast við slíkar aðstæður sem eykur hættu á köfunarveiki, en hluti erindisins varðaði öryggisstjórnun við aðgerðirnar.
Myndband frá þessum aðgerðum var sýnt á fyrirlestrinum, sem gefur innsýn í aðstæður viðbragðsaðila. Þó er eflaust margt sem myndbandinu tekst ekki að gefa til kynna, líkt og hugarástand kafaranna. Ásgeir, hjá Landhelgisgæslunni, lýsti því til að mynda að á þessu dýpi líði manni „eins og maður sé búinn með fjóra martini“.
Að lokum tókst að hífa vélina upp á yfirborðið, en þá þurfti að koma henni í land. Það var flókið vegna þess að vatn er með meiri mótstöðu en loft, og því mætti segja að vélin reyni að fljúga í vatninu. Með því að stýra henni í gengum rennu tókst þó að koma flakinu í land.
