„Það eru 10 ár síðan gott líf okkar varð betra og innihaldsríkara, Nói mætti á svæðið. Munum að fagna fjölbreytileikanum, það er hann sem gerir lífið betra,“ segir Guðmundur Ármann Pétursson, athafnamaður og rekstrarfræðingur og faðir Nóa Snæs, 10 ára drengs sem fæddur er með Downs-heilkennið.
Í dag, 21. mars, er alþjóðlegur dagur einstaklinga með Downs og því ber að sjálfsögðu að fagna.
Mynd dagsins er af Nóa, Kolfinnu og Baldri Inga en umrædd mynd birtist fyrst á vef Pressunnar árið 2015 í tilefni af alþjóðadegi einstaklinga með Downs. Félag áhugafólks um Downs-heilkennið útbjó þessa fallegu mynd til að vekja athygli með jákvæðum hætti á Downs-heilkenninu.
Í tilefni þess að alþjóðlegur dagur einstaklinga með Downs er í dag er myndin hér birt aftur. Með myndinni fylgdu mikilvæg skilaboð frá Kolfinnu, Nóa og Baldri Inga:
Við erum Kolfinna, Nói og Baldur Ingi. Við erum með Downs heilkenni. Við erum ekki Downs heilkenni. Við erum Kolfinna, Nói og Baldur Ingi.
