Mynd dagsins að þessu sinni birtist á Twitter og tengist tölum sem birtar voru í morgun yfir fjölda kórónuveirutilfella hér á landi síðasta sólarhringinn. Alls greindust 50 innanlandssmit og hefur þeim nú farið fækkandi þrjá daga í röð.
Þó að nýgengi innanlandssmita sé enn með því hæsta sem gerist hafa þau tíðindi orðið að kúrfan í þessari þriðju bylgju er farin að fletjast örlítið út. Tölvunarfræðingurinn Gunnar Már vakti athygli á þessu á Twitter í morgun og birti mynd máli sínu til stuðnings sem sjá má hér neðst.
Við myndina skrifaði hann:
„Það þarf stundum lítið til að gleðja mann. Í dag er það þessi pínuponsulitla sveigja á covid línuritinu. Fyllir mig bjartsýni.“
Þórólfur Guðnason sóttvarnalæknir sagði á upplýsingafundi almannavarna í dag að mikilvægt væri að halda áfram með aðgerðir til að sveigja faraldurinn niður. Sagði hann að næstu dagar og vikur muni skera úr um árangur þeirra aðgerða sem þegar hefur verið gripið til. Varaði hann við of mikilli bjartsýni.
„Ég held að það sé allt of fljótt að fara að hrósa happi þannig að við þurfum að halda áfram að standa okkur í þeim aðgerðum sem sem eru í gangi nú,“ sagði hann.
Þá er rétt að benda á að töluvert færri sýni voru tekin um helgina miðað við virku dagana í síðustu viku. Þó er jákvætt að 66% þeirra sem greindust í gær voru þegar í sóttkví.
Það þarf stundum lítið til að gleðja mann. Í dag er það þessi pínuponsulitla sveigja á covid línuritinu. Fyllir mig bjartsýni. pic.twitter.com/DXZNFHeeqh
— gunnare (@gunnare) October 12, 2020
