Elliði Vignisson, bæjarstjóri Ölfuss, birti áhugaverða mynd á Facebook-síðu sinni í morgun. Samkvæmt henni virðist eftirspurnin eftir ferðalögum til Íslands enn vera umtalsverð þó að ferðamannastraumurinn hafi sjaldan verið minni en um þessar mundir.
„Ísland fetar sig nú hægt og örugglega inn í niðursveiflu í efnahagslífinu. Ferðaþjónustan finnur þyngst fyrir þessu. Gleymum samt ekki að margt bendir til þess að þetta ástand vari ekki lengi og landið rísi jafnvel hraðar en nú er spáð,“ segir Elliði og bætir við:
„Það er eðlilegt að salan í sjoppunni falli niður á meðan hún er lokuð, eftirspurnin er hins vegar enn til staðar - meira að segja meiri en oftast áður. Til marks um þetta má td. hafa hversu margir leita að "ferðalög til Íslands" á netinu,“ segir hann og birtir myndina sem sjá má hér að neðan.
Ef eitthvað er að marka þessa mynd, sem sýnir fjölda leita á Google með leitarorðunum „Travel to Iceland“, sést að um það bil jafn margir slá þessum leitarorðum inn á Google nú og gerðu í upphafi árs 2016. Hæst fór þetta hlutfall árið 2010, eftir gosið í Eyjafjallajökli og svo árið 2017. Á fyrri hluta þessa árs sést býsna skörp dýfa sem skýrist væntanlega af COVID-19 faraldrinum en svo stórt stökk upp á við nú í haust.
