Segja má að nokkuð fjörugar umræður fari nú fram á netinu um klæðaburð Sigurðar Inga Jóhannssonar, samgöngu- og sveitarstjórnarráðherra, í viðtali í kvöldfréttum Stöðvar 2 í gærkvöldi.
Sigurður Ingi var þar í viðtali um uppbyggingu hafnarmannvirkja í Reykjanesbæ til að mæta miklu atvinnuleysi á Suðurnesjum. Viðtalið við Sigurð Inga var tekið í gegnum fjarfundarbúnað og er skemmst frá því að segja að sparifötin voru víðs fjarri í umræddu viðtali. Sigurður Ingi var heimilislegur og klæddur í hvítan nærbol, eins og flestir karlmenn eiga væntanlega inni í skáp.
„Eina leiðin fyrir ráðherra að toppa þetta er að mæta ber að ofan í viðtal,“ segir Gunnar Smári Egilsson, stofnandi Sósíalistaflokksins, í innleggi sem hann setti á Facebook-síðu flokksins. Við innleggið setti hann meðfylgjandi skjáskot af Sigurði Inga.
Sitt sýnist hverjum um þetta og hrósuðu margir Sigurði Inga fyrir að mæta til dyranna eins og hann var klæddur, í orðsins fyllstu merkingu. „Bara heimilislegur, ekkert má maður. Ekki einu sinni heima hjá sér,“ segir í einni athugasemd á meðan annar bætir við að við ættum að þakka fyrir að menn komi í viðtöl í tíma og ótíma og gefi sér aldrei frí.
„Alþingisfólk er, og á að vera, fólk eins og ég og þú. Gagnrýnum fólk á orðum þeirra, gjörðum og hæfni til starfsins, ekki klæðaburði,“ segir í enn annarri athugasemd en Gunnar Smári segist þó ekki hafa verið að kvarta, bara að benda á hið óvanalega.
