Þeir sem lifa og hrærast í hringiðu stjórnmála hér á landi verða oft á tíðum fyrir býsna óvæginni gagnrýni, til dæmis á samfélagsmiðlum. Þetta þekkja borgarfulltrúar í Reykjavík ágætlega enda oft á tíðum mikill hiti í umræðum um málefni sem varða höfuðborgina.
Sigurborg Ósk Haraldsdóttir, borgarfulltrúi Pírata og formaður skipulags- og samgönguráðs, birti á Twitter-síðu sinni tölvupóst sem henni barst í gærkvöldi þar sem hún er meðal annars sögð þrjósk. Veltir hún því fyrir sér hvort það sé góður eða slæmur eiginleiki.
Í tölvupóstinum segir orðrétt:
„Það er oftast rökþrota fólk, sem svarar ekki í rökræðum. Ég hef fylgst með þér í fjölmiðlum á kjörtímabilinu, og hef komist að því, að þú tekur aldrei ráðum annarra. Eina röddin sem þú hlustar á, er þín eigin rödd. Þrjósk ert þú kona, og líka Dagur Bé.“
Helgu Völu Helgadóttur, þingkonu Samfylkingarinnar, þykir orðalagið í tölvupóstinum kunnuglegt. „Heyy er þetta mögulega vinur minn sem byrjar á B? Svipað orðalag, stuttir póstar, geggjaður stuðpinni.“
Í umræðum eru svo skiptar skoðanir um það hvort það sé jákvætt eða neikvætt að vera þrjósk/ur. „Neikvætt; einörð gæti verið jákvæða útgáfan,“ segir einn á meðan annar bætir við: „Í þessu tilfelli jákvætt.“
Fékk póst rétt í þessu. Er þrjósk jákvætt eða neikvætt lýsingarorð? pic.twitter.com/hiEbQjQMHk
— Sigurborg Ósk Haraldsdóttir (@SigurborgOsk) October 1, 2020
