Mynd dagsins birti Grafarvogsbúi að nafni Reynir í Facebook-hópi íbúa þessa fjölmenna hverfis. Myndin er af nokkuð stórri og pattaralegri rottu sem skartar rauðri hálsól. Það sem Reynir skrifar við myndina hefur komið mörgum til að brosa:
„Kæru nágrannar.
Við fjölskyldan höfum fengið okkur nokkrar rottur sem gæludýr. Þær hafa allar verið vel heilbrigðisskoðaðar og innihalda ekki neina þekkta sjúkdóma.
Til að forðast rugling höfum við sett á þær hálsól svo þær þekkist frá öðrum mögulegum rottum sem eiga þó ekkert að vera á ferðinni.
Þar sem rottur eru nokkuð forvitin dýr biðjum við fólk sem ekki vill fá rotturnar inn til sín um að hafa ekki meira en 3-5cm rifu á gluggunum hjá sér.
Þetta eru huggulegustu dýr og vona ég að þið takið vel á móti þeim í hverfinu.“
Færslan hefur fengið góð viðbrögð í hópnum og uppskorið mörg „læk“, en eins og glöggir lesendur ættu eflaust að vita er um grín að ræða. Myndin sem fylgir færslunni má sjá hér að neðan.
