Lögreglan á höfuðborgarsvæðinu fór í óvenjulega björgunaraðgerð í vikunni, en hún fékk tilkynningu um áttavilltan lunda sem var á vappi í Suðurhlíðunum.
Ekki fylgdi tilkynningunni sem lögreglan fékk hvort lundinn væri særður.
Tveir lögregluþjónar voru sendir á vettvang til að kanna málið og eftir stutta leit fannst lundinn.
„Hann var ánægður að sjá okkur og var hinn gæfasti í höndum lögreglu.“ segir í tilkynningu frá löggunni.
Lögreglan ákvað að fara með lundan til dýrahirðis í Húsdýragarðinn sem tók vel á móti honum og ætlaði að gera viðeigandi ráðstafanir.
Fram kemur að lundinn var mjög rólegur og hæst ánægður með bílferðina í lögreglubílnum.
„Sum útköll eru einfaldlega skemmtilegri en önnur og það má svo sannarlega segja um þetta útkall. Góða helgi og göngum hægt um gleðinnar dyr.“ segir tilkynningunni.
