Ólíklegt þykir að leikarinn, leikstjórinn og rithöfundurinn Karl Ágúst Úlfsson hafi fundið nýju stjórnarskrána í dag. Karl Ágúst birti skemmtilega mynd af sér á Facebook og varpaði eftirfarandi spurningu fram:
„#hvar getur nýja stjórnarskráin verið? Hjálpumst öll að við að leita. Hún hlýtur að finnast á endanum, annað væri fáránlegt,“ segir Karl Ágúst en á myndinni má sjá hann svipast um eftir stjórnarskránni undir húddinu á bifreið sinni.
Almenningur leitar nú að nýju stjórnarskránni undir myllumerkinu #Hvar? Með herferðinni er vakin athygli á því að í október eru átta ár frá því að þjóðin greiddi atkvæði um nýja stjórnarskrá í þjóðaratkvæðagreiðslu og í nóvember verður áratugur frá því að blásið var til þúsund manna þjóðfundar um stjórnarskrármál í aðdraganda þess að stjórnlagaráð tók til starfa.
Fólk tekur þátt í herferðinni með því að deila myndum af sér á samfélagsmiðlum þar sem það leitar að stjórnarskránni meðal annars í ruslafötum, innan um runna og á bak við húsgögn á heimilinu. Er þetta gert undir myllumerkinu #Hvar? Um 19 þúsund hafa skrifað undir áskorun til Alþingis, á vegum Samtaka kvenna um nýja stjórnarskrá, um lögfestingu nýrrar stjórnarskrár.
