„Eins svalt og það er að vera kominn með nýja handleggi eftir 23 ár án þeirra, þá gerist það ekki án þess að færa ákveðnar fórnir,“ segir Guðmundur Felix Grétarsson.
Guðmundur gekkst nýlega undir handleggjaágræðslu í frönsku borginni Lyon og hefur hann dvalið á sjúkrahúsi að undanförnu þar sem hann jafnar sig eftir hina flóknu aðgerð. Guðmundur Felix heldur fylgjendum sínum upplýstum um bataferlið á Instagram-síðu sinni og í gær birti hann nokkuð skemmtilega mynd af hnakkanum á sér.
Eins og sést glögglega er kominn myndarlegur skallablettur sem rakinn er til mikillar legu Guðmundar undanfarnar vikur. Ekki þykir þó ólíklegt að lyf sem Guðmundur tekur eftir aðgerðina eigi sinn þátt í hárlosinu. Það er sjaldan langt í húmorinn hjá Guðmundi sem skrifar á ensku: „I’ve lost a shit load of hair. I want my Mojo back.“
