„ATH! Ekki opna fyrir þessum tveim, þetta eru glæpamenn.“
Svona hefst skemmtileg færsla sem birtist inn í Facebook-hópi íbúa í Langholtshverfi, en með færslunni fylgdi mynd af tveimur kunnuglegum andlitum.
„Sá minni gæti mögulega bankað uppá klæddur sem lögregluþjónn og komist þannig inn, en það er bara til að sjá hvað þið eigið og mögulega kemst húsið ykkar þá á “hit” listann,“ segir enn fremur í færslunni.
Eins og glöggir lesendur taka eftir eru þetta leikararnir Joe Pesci og Daniel Stern sem léku heldur óheppna innbrotsþjófa í Home Alone-myndunum, einhverjum vinsælustu jólamyndum sögunnar. Kevin litli, sem leikinn var af Macaulay Culkin, sá við öllum þeirra tilraunum með eftirminnilegum og sprenghlægilegum hætti.
Íbúar í Langholtshverfi – eða öðrum hverfum borgarinnar – þurfa því ekki að hafa varann á sér ef þeir sjá þessa tvo á vappinu.
