Mynd dagsins að þessu sinni birti þingkonan Rósa Björk Brynjólfsdóttir á Twitter-síðu sinni.
Eins og fjallað hefur verið um er Rósa fyrsti flutningsmaður þingsályktunartillögu þess efnis að bjóða til Íslands í þungunarrof erlendum konum sem búa við stranga löggjöf í sínum heimalöndum. Hefur tillagan verið sögð helst miðast við konur frá Póllandi og Möltu.
Myndin vísar einmitt til þessarar tillögu Rósu en hún sýnir borða sem búið er að hengja upp á göngubrú yfir Kringlumýrarbraut. Á borðanum stendur orðrétt: „Pólska samfélagið á Íslandi þakkar fyrir stuðninginn við mannréttindabaráttu pólskra kvenna.“
Rósu hlýnaði um hjartarætur þegar hún sá skilaboðin og sagði á Twitter:
„Þetta er eitt það fallegasta sem ég hef séð í dag. “Pólska samfélagið á Íslandi þakkar fyrir stuðning við mannréttindabaráttu pólskra kvenna” Ég styð ykkur alla leið!“
Meðal þeirra sem skrifa athugasemdir við færslu Rósu er Gísli Marteinn Baldursson, sjónvarpsmaður og fyrrverandi borgarfulltrúi. Hann segir: „Vorum að kveðja eina dásamlega kaffibaristu af Kaffi Vest sem er búin að vinna hjá okkur lengi. Er að fara að opna eigið jóga stúdíó. Hún og vinkonur hennar, pólskar, sem allar sjá framtíð sína hér á landi, líta á þig sem algjöra hetju Rósa. Báðu mig um að skila því til þín.“
Þetta er eitt það fallegasta sem ég hef séð í dag⚡️❤️
— Rósa Björk B (@RosaBjorkB) November 19, 2020
“Pólska samfélagið á Íslandi þakkar fyrir stuðning við mannréttindabaráttu pólskra kvenna”
Ég styð ykkur alla leið ! ❤️⚡️#StrajkKobiet pic.twitter.com/fGOIEzUeOu
