Mynd dagsins: Anna keypti sér blæju­bíl á Tenerife – „Akandi um allt eins og ung­pía“

Anna Kristjáns­dóttir, íbúi á Tenerife, er í sjöunda himni þessa dagana eftir að hún gerði býsna góð kaup á bif­reið á eyjunni fögru. Anna heldur fylgj­endum sínum á Face­book reglu­lega upp­lýstum með skemmti­legum pistlum og í morgun birti hún býsna skemmti­lega mynd af sér á nýja bílnum.

„Það var einu sinni Þjóð­verji sem átti tvö heimili. Tíu mánuði ársins bjó hann í Þýska­landi og stundaði sín við­skipti. Suður í Para­dís átti hann annað heimili og bjó þar tvo mánuði á ári, átti hús á báðum stöðum og naut lífsins. Þegar kom að sumar­leyfinu settist hann upp í sport­bílinn sinn og ók suður til Spánar, þar um borð í ferju og á­fram til Tenerife,“ segir Anna í færslunni en þessi á­gæti Þjóð­verji var sum sé eig­andi bílsins.

„Svo fór Þjóð­verjinn á eftir­laun. Maður á eftir­launum þarf ekki að eiga tvö hús og sport­bíl svo hann seldi húsið sitt í Þýska­landi og flutti til Tenerife þar sem hann á­kvað að losa sig við blæju­bílinn frá Mercedes og fá sér jepp­ling eins og aðrir eftir­launa­menn enda maðurinn gamall og stirður og erfitt að fara inn í bílinn. Maðurinn örugg­lega kominn yfir sex­tugt og stoð­kerfis­vanda­málin farin að segja til sín. Vanda­málið var bara að bíllinn sem var einungis keyrður 100 þúsund kíló­metra þótt hann væri 17 ára gamall var að verða verð­laus sökum aldurs.“

Til að gera langa sögu stutta er gamli maðurinn kominn á nýjan bíl og búinn að selja Önnu sport­bílinn.

„Gömul kona í Los Cristianos, kona sem einnig er komin á eftir­laun, vildi eignast bíl. Í dag má sjá gömlu konuna sem komin er ná­lægt sjö­tugu á gömlum Mercedes sport­bíl án topp­lúgu en með blæju akandi um allt eins og ung­pía og ef hlustað er vand­lega á hljóðin úr bílnum þegar se­ven­tís eða eitís tón­listin þagnar, má heyra gömlu konuna raula fyrir munni sér á ís­lensku:

Ég fer í ljós þrisvar í viku

og mæti reglu­lega í líkams­rækt

ég fer í Hollywood um helgar

með mynd af bílnum í vasanum.

P.s. Það á eftir að þrífa Cali­ma­rykið frá Sahara af bílnum og bóna hann.