Lögreglan á höfuðborgarsvæðinu birti mynd dagsins að þessu sinni á Facebook-síðu sinni. Um páskana voru landsmenn hvattir til að ferðast innanhúss vegna COVID-19-faraldursins og hlýddu margir þeim tilmælum.
Hugtakið að ferðast innanhúss öðlaðist þó nýja merkingu í hugum þeirra sem urðu vitni að því er hús var flutt í heilu lagi um götur borgarinnar á dögunum.
Verið var að flytja hús úr Mosfellsbæ og í vesturbæ Reykjavíkur en meðfylgjandi myndir voru teknar af starfsmanni Minjastofnunar og þær birtar með góðfúslegu leyfi hans.
„Mikið væri nú gaman ef allir gætu ferðast svona innanhúss! Nei, annars það myndi bara enda með stórum umferðarhnút og ástandið yrði þá ennþá verra en það sem við þekkjum úr bæði morgun- og síðdegisumferðinni á höfuðborgarsvæðinu alla virka daga,“ sagði lögreglan í færslu sinni.
„Að öllu gamni slepptu þá sýna myndirnar eitt af mörgum og margvíslegum verkefnum sem lögreglan sinnir, en hér var verið að flytja hús úr Mosfellsbæ og í vesturbæ Reykjavíkur. Þótt svona flutningur fari fram utan háannatíma hefur hann áhrif á umferðina engu að síður og það er að mörgu að hyggja enda má ekkert fara úrskeiðis,“ sagði í skeyti lögreglu.
Mikið væri nú gaman ef allir gætu ferðast svona innanhúss! Nei, annars það myndi bara enda með stórum umferðarhnút og...
Posted by Lögreglan á höfuðborgarsvæðinu on Laugardagur, 18. apríl 2020
