Titringur er innan ríkisstjórnarinnar vegna þess hvernig var staðið að útboðinu á hlut ríkisins í Íslandsbanka á dögunum.
Lilja Alfreðsdóttir, viðskiptaráðherra og varaformaður Framsóknarflokksins, sagði í viðtali í Morgunblaðinu í morgun að hún væri ekki hlynnt þeirri ákvörðun að selja hlutinn til valins hóps fjárfesta.
„Miðað við aðstæður og umræðuna nú tel ég að hægja verði á einkavæðingunni. Í mínum huga er líka alveg ljóst að Landsbankinn skuli vera áfram í eigu þjóðarinnar. Sala á honum kemur ekki til greina,“ sagði hún.
Þá benti hún á að ábyrgðin hlyti að vera stjórnmálamannanna sem tóku ákvörðun í málinu, en ekki að skella skuldinni alfarið á stjórnendur Bankasýslunnar.
Helga Vala Helgadóttir, þingkona Samfylkingarinnar, veltir því fyrir sér hvort ríkisstjórnin muni springa.
„Það skyldi þó aldrei vera að framsókn, sem hefur ekkert sagt alla vikuna um bankasöluna, sprengdi á endanum ríkisstjórnina. Það að viðskiptaráðherra skutli rotaranum með þessum hætti á fjármálaráðherra á sama tíma og þingmenn og ráðherrar Vg (og auðvitað Xd) eru upp að öxlum í flórnum í vörninni fyrir hann mun ekki beint vera til að bæta slæmt ástand í ríkisstjórninni.“
