Magnús Már Einarsson tilkynnti í dag að hann er hættur sem ritstjóri Fótbolta.net eftir nítján ár í starfi. Hann deilir ansi skemmtilegri frásögn af því við tilefnið þegar hann nálgaðist stórstirnið José Mourinho á Laugardalsvelli árið 2004, þá 14 ára gamall.
Magnús hefur starfað á miðlinum frá árinu 2002, en þá var hann einungis 13 ára gamall. „Þrátt fyrir að vera 140 cm á hæð og skrækróma á þessum tíma (og reyndar allt til 18 ára aldurs) var mér virkilega vel tekið og fljótlega var ég farinn að fjalla um leiki í öllum deildum og taka viðtöl við ýmsar stjörnur í boltanum,“ skrifar Magnús í einlægri færslu sem hann birtir á Twitter.
„Jose Mourinho var reyndar ekki alveg að átta sig þegar ég bað hann um viðtal á Laugardalsvelli árið 2004...hann hélt líklega að það væri falin myndavél í gangi,“ skrifar Magnús hnyttinn í færslunni.
Eftir hann standa 76.918 fréttir og því sannarlega tímamót hjá Magnúsi. Í frétt á Fótbolta.net kemur fram að hann ætli nú að draga sig í hlé frá fjölmiðlastörfum og einbeita sér að þjálfaraferlinum og fjölskyldu. Elvar Geir Magnússon, sem stýrt hefur miðlinum með Magnúsi, heldur áfram í stóli ritstjóra.
„Ég hef kynnst ótrúlega mikið af skemmtilegu og góðu fólki í gegnum starf mitt á .net í gegnum tíðina, farið í ógleymanlegar ferðir erlendis að fylgja íslenska landsliðinu (hápunktarnir EM og HM) og þessi vinna hefur verið gífurlega gefandi og skemmtileg. Fótbolti.net er í frábærum höndum í dag og mun pottþétt halda áfram að vaxa og dafna með hverju árinu líkt og hingað til. Ég hætti mjög sáttur og breytist úr starfsmanni yfir í dyggan lesanda Fótbolta.net. Takk kærlega fyrir mig!“
Takk fyrir mig #fotboltinet
— Magnús Már Einarsson (@maggimar) June 9, 2021
⌚ 19 ár
🖥 76918 fréttir
🙏 Frábærir tímar þar sem ég hef kynnst fullt af góðu fólki pic.twitter.com/HtboNlG1al
