Íbúar í Mosfellsbæ voru margir hverjir ósáttir með hvernig flugeldasýningunni á bæjarhátíðinni „Í túninu heima“ var háttað.
Fjöldi fólks stóð á torginu í Mosfellsbæ þar sem helstu skemmtanahöld hátíðarinnar fóru fram rétt áður en flugeldasýningin hófst. Eftir að hún hófst tók fólk til að baula vegna þess að fólk sem stóð á torginu sá enga flugeldasýningu vegna nýbygginga sem reistar hafa verið upp frá því að hátíðin var síðast haldin.
„Hefði mátt hafa hana örlítið lengra í burtu frá torginu þar sem ALLT VAR, kannski nær Reykjavík svo þetta sæist enn þá minna,“ segir einn í athugasemd í hverfishóp á Facebook.
Flugeldum var ekki skotið upp á sama stað og hefð er fyrir, heldur var skotið upp við veginn sem liggur upp að Lágafellskirkju, en skipuleggjendur tóku ekki inn í jöfnuna nýbyggingar sem stóðu fyrir hátíðargestum.
„Þetta er besta flugeldasýning sem ég hef heyrt,“ segir einn íbúi Mosfellsbæjar í bæjarhópnum á Facebook, Mosó – bærinn okkar.
„Vá hvað flugeldasýningin var á glötuðum stað. Enginn á torginu sá hana, sorglegt,“ skrifar annar.
Einn íbúi kemur þessu til varnar og segir: „Eðlilega ekki hægt að sprengja nær torginu þar sem það er búið að troða 50 blokkum í miðbæinn síðan síðast sem myndi stafa eldhætta af.“
