Mögnuð breyting hjá Dóru: Kíkir reglu­lega á ljós­myndina sem tekin var fyrir akkúrat ári

„Ég tárast og fæ hroll þegar ég horfi á ljós­mynd af mér fyrir akkúrat ári síðan,“ segir leik­konan Dóra Jóhanns­dóttir í færslu á Face­book-síðu sinni.

Í færslunni fagnar hún því að hafa verið edrú í eitt ár.

„Að hætta að drekka var á­kvörðun sem ég tók fyrir tæpum 3 árum, enda neyslan farin að hafa mikil nei­kvæð á­hrif á líf mitt. En það reyndist þrautinni þyngra að ná því. Botninn varð alltaf dýpri og dýpri og fyrir ári síðan var ég búin að missa alla stjórn, líf mitt var komið í al­gjöra rúst og ör­væntingin var rosa­leg,“ segir Dóra í færslunni.

Dóra segist hafa þurft mikla hjálp sem hún blessunar­lega fékk og kveðst hún vera ó­endan­lega þakk­lát fólkinu sem hefur hjálpað henni og staðið við bakið á henni í þessu bata­ferli. „Ég hefði aldrei getað þetta ein,“ segir hún.

Hún segist reglu­lega kíkja á um­rædda ljós­mynd sem tekin var fyrir ári til að minna sig á hvaðan hún kemur.

„Ég hef breyst mikið og þroskast og líf mitt í dag er ó­trú­lega fal­legt og gott og sí­fellt að koma mér á ó­vart. Ég hef fundið fyrir hamingju og frið sem ég vissi ekki að væri til! Ég er stút­full af þakk­læti og vil koma því fram að ég er til staðar fyrir hvern þann sem vill hjálp við að verða edrú.“

Dóra hefur haft góðar á­stæður til að fagna að undan­förnu en í desember greindi Frétta­blaðið frá því að hún hefði út­skrifast úr Hús­stjórnar­skólanum.

„Ég hefði viljað að námið væri mörg ár en ekki bara ein önn. Brjáluð vinna frá morgni til kvölds, blæðandi fingur og vöðva­bólga en alltaf hlýtt í hjartanu,“ sagði Dóra við það til­efni.