Þau ummæli Bjarna Benediktssonar fjármálaráðherra að fjármagn hafi ekki fylgt nýsamþykktu lagafrumvarpi um gjaldfrjálsa sálfræðiþjónustu hafa vakið talsverða athygli. Um er að ræða mikið hagsmunamál fyrir þá sem nýta sér sálfræðiþjónustu en breytingin felur í sér að þjónustan falli undir greiðsluþátttökukerfi Sjúkratrygginga Íslands.
Bjarni sagði að Svandísi Svavarsdóttur heilbrigðisráðherra væri heimilt, ef hún fyndi peninga í þeim heildarheimildum sem hún hefur, til að gera umræddan samning. Helga Vala Helgadóttir, þingmaður Samfylkingarinnar, gagnrýnir ummæli Bjarna harðlega.
„Mikið ofboðslega er þetta lélegt. Svandís er ekki fjármálaráðherra sem ber meðal annars að afla tekna. Henni ber að framfylgja þeim lögum sem undir hana heyra og ég treysti henni og hvet hana til að klára málið og mun styðja hennar baráttu fyrir fjárveitingu í málaflokkinn,“ segir hún í færslu á Facebook-síðu sinni.
Fréttablaðið ræddi við Tryggva Guðjón Ingason, formann Sálfræðingafélags Íslands, í gærkvöldi sem kvaðst vera hissa á ummælum Bjarna.
„Það kemur mér mjög á óvart ef það er sýn hans á málinu,“ sagði Tryggvi um það að ekkert fjármagn liggi að baki nýsamþykktu frumvarpinu.
„Allir þingmenn sem voru viðstaddir samþykktu breytinguna. Þannig það kæmi mér mjög á óvart ef það er ekki búið að gera ráð fyrir fjármagni fyrir þetta.“
