Friðrik Sigurbjörnsson, bæjarfulltrúi Sjálfstæðisflokksins í Hveragerðisbæ, greinir á Facebook síðu sinni frá ólöglegum fundi bæjarstjórnar Hveragerðisbæjar.
„Fundarboð barst bæjarfulltrúum og varamönnum þeirra kl. 17:01 þriðjudaginn 12. júlí 2022 fyrir bæjarstjórnarfund sem halda átti 17:00 fimmtudaginn 14. júlí,“ skrifar Friðrik.
Fundurinn er ólögmætur vegna þess að sveitarstjórnarlög kveða á um að fundarboð skuli berast að minnsta kosti 48 klukkustundum fyrir fund. Í þessu tilfelli voru einungis 47 klukkustundir og 59 mínútur frá fundarboði að fundinum sjálfum.
„Í fyrsta skipti í meira en 16 ár þurfti að slíta bæjarstjórnarfundi og boða til nýs fundar þar sem fundarboð barst ekki með lögmætum fyrirvara,“ skrifar Friðrik, en síðustu sextán ár hefur Sjálfstæðisflokkurinn farið með völd í Hveragerði. Það breyttist eftir kosningarnar á þessu ári þegar Framsókn og O-listinn mynduðu meirihluta.
Meirihlutinn kallaði þetta „tittlingaskít“ og Friðrik segir að það kunni að vera að það sér rétt. „En lög eru lög,“ skrifar hann.
„Við í D-listanum erum öll af vilja gerð að vinna með Framsókn og O-listanum að góðum málum en við viljum einnig að viðhöfð verði fagleg og góð vinnubrögð næstu 4 árin líkt og hefur verið síðustu 16 ár,“ skrifar Friðrik.
Friðrik vill að boðaður sé nýr fundur með lögmætum hætti.
Sjá má skjáskot af Facebook færslu hans hér að neðan:
