Bóluefni við kórónaveirunni er í augsýn og ekki þarf að óttast að gerðar verði minni öryggiskröfur þótt hratt sé unnið að því að finna það og koma því í dreifingu. Þetta segir Ingileif Jónsdóttir prófessor við læknadeild Háskóla Íslands og deildarstjóri smit- og bólgusjúkdóma hjá Íslenskri erfðagreiningu í viðtali hjá Lindu Blöndal í þættinum 21 á Hringbraut í kvöld, fimmtudag.
„Um 80 rannsóknarhópar um allan heim eru að vinna að þróun bóluefna en það eru aðeins um fimm sem eru komin í þróun á mönnum, allt hitt er meira eða minna í tilraunadýrum“, segir Ingileif en staðan sé betri en von var á.
Í dag er helst litið til þóunar bóluefnis í samvinnu stærstu bóluefnaframleiðendum heims. GlaxoSmithKline (GSK) í Belgíu og Ítalíu og Sanofi í Frakklandi tilkynntu samvinnu í vikunni. Byggja þau á fyrri aðferðum gegn Inflúensuveiru og Svínaflensunni 2009, tegundum bóluefna sem búið er að sannreyna, að sögn Ingileifar.
„Þessi fyrirtæki reikna með að vera komin með bóluefni eftir tólf til átján mánuði frá því þeir byrja í sumar að prófa það á fólki eða í júnímánuði“.
Þessi fyrirtæki vinna í fyrsta skipti saman í framleiðslu lyfja og segir Ingileif slíkt nýtt og vinnulagið núna einkennist af viljanum til að vinna saman frekar en að hefðbundinni samkeppni og kapphlaupi um gróða.
Fyrir tilstuðlan stofnunar Bill og Melindu Gates, sem hefur verið einn aðal styrktaraðili fyrir bóluefnaþróun í heiminum, hafa stærstu fimmtán lyfjafyrirtæki heims sameinast um að fella niður hugverkarétt og -gjöld svo hægt verði að framleiða bóluefnið á mörgum stöðum undireins og það finnst.
