Eysteinn Bergmann Guðmundsson, verslunarmaður og einn fremsti knattspyrnudómari okkar Íslendinga til margra ára, lést á Landspítalanum þann 5. ágúst. Eysteinn var fæddur árið 1941 og var því á 79. aldursári þegar hann lést.
Eysteinn var mikill Þróttari og lék hann bæði handbolta og fótbolta með félaginu. Hann var þó meira áberandi í knattspyrnudeildinni þar sem hann lék 111 leiki með meistaraflokki félagsins. Þá þjálfaði hann yngri flokka félagsins og meistaraflokkinn árin 1970 til 1971. Þá var hann formaður handknattleiksdeildar Þróttar árin 1967 til 1972.
Eysteinn var þó sem fyrr segir lengi vel einn af okkar fremstu dómurum en í minningargrein í Morgunblaðinu í dag kemur fram að hann hafi ungur tekið dómarapróf og dæmt knattspyrnuleiki í 30 ár.
„Hann var einnig virtur alþjóðadómari í 15 ár og dæmdi fjölmarga leiki á erlendri grund. Hann tók þátt í félagsstörfum dómara og sat í ráðum og stjórnum á vegum KSÍ og var hann sæmdur gullmerki Þróttar og KSÍ,“ segir í greininni.
Bragi V. Bergmann og Gylfi Þór Orrason, knattspyrnudómarar til margra ára, eru í hópi þeirra sem minnast Eysteins í Morgunblaðinu í dag.
„Knattspyrnufélagið Þróttur var sannkallað stórveldi í dómgæslunni á árum áður,“ segja þeir félagar í grein sinni og benda á að sex Þróttarar hafi orðið alþjóðlegir dómarar, þeirra á meðal Eysteinn.
„Undirritaðir voru í hópi þeirra „ungu og upprennandi“ knattspyrnudómara sem beið það erfiða hlutskipti að leysa þessa kappa af hólmi á knattspyrnuvellinum. Við mættum til leiks blautir á bak við eyrun en nutum leiðsagnar nokkurra af gömlu meisturunum. Eysteinn var í þeim hópi, því hann var bæði eftirlitsmaður dómara og sat í dómaranefnd KSÍ árum saman. Hann gaf okkur góð ráð og stappaði í okkur stálinu þegar þess þurfti en umfram allt var hann góður og skemmtilegur félagi.“
Bragi og Gylfi segir að Eysteinn og fleiri úr þessum hópi hafi líka lagt þeim til gott veganesti þegar þeir urðu þess heiðurs aðnjótandi að feta í fótspor þeirra á alþjóðavettvangi.
„Fyrir það þökkuðum við heilshugar á sínum tíma en þökkum aftur að leiðarlokum. Eysteinn var ekki hár á velli en þeim mun stærri persónuleiki. Hann var ávallt glaður í bragði og snaggaralegur. Líkamstjáning hans var þannig að jafnvel hávöxnustu knattspyrnumenn lögðu ekki í að deila við dómarann. Umfram allt var Eysteinn þekktur fyrir að hafa fulla stjórn á þeim leikjum sem hann dæmdi. Þar komst enginn upp með einhvern moðreyk. Við kveðjum góðan dreng með söknuði og virðingu.“
Útför Eysteins fer fram frá Lindakirkju í Kópavogi í dag.
