Bæði slökkvilið og lögregla voru send af stað þegar neyðarlínunni barst símtal frá barni sem tilkynnti um eld. Ekkert meira kom fram í samtalinu sem lauk örskömmu síðar.
Í skeyti lögreglunnar á Suðurlandi um verkefni liðinnar viku kemur fram að símtalið hafi verið rakið í heimahús í austurhluta umdæmisins. Viðbragðsaðilar brugðust að vonum skjótt við og fór lögregla og slökkvilið af stað. Ekki reyndist vera fótur fyrir tilkynningunni en barnið fannst og var, að ósk foreldra þess, rætt við það um hvernig eigi að nota 112.
Lögreglan á höfuðborgarsvæðinu hefur haft í mörg horn að líta að undanförnu. Alls voru 33 kærðir fyrir of hraðan akstur í umdæminu í síðustu viku, en af þeim voru 24 gómaðir á svæðinu í kringum Vík og Kirkjubæjarklaustur.
Þá voru tvö þjófnaðarmál skráð í dagbók lögreglu. Í báðum tilfellum var reiðufé stolið af erlendum ferðamönnum. Farið var inn í ökutæki við fjölfarna ferðamannastaði og peningar teknir.
