Mesta kulda­kast í Reykja­vík frá 2013: Íbúar þurfa að spara heita vatnið

Yfir­vofandi er eitt mesta kulda­kast í Reykja­vík frá árinu 2013, að sögn Einars Svein­björns­sonar veður­fræðings sem heldur úti vefnum Blika.is.

„Norðan loftið sem steypist yfir okkur næstu daga er hrein­ræktað heim­skauta­loft,“ segir Einar á vef Bliku og bætir við að vetrar­kuldi sé al­mennt í stórum dráttum af tvennum toga.

„Annars vegar þegar er hæg­látt og stjörnu­bjart. Yfir­borðið kólnar og frost í 2 metra hæð mælist mikið. Ofar er oft hlýrra og því ekki endi­lega svo kalt loft á ferðinni. Hin gerðin er þegar loftið kemur frá köldum svæðum með strekkingi og stundum hvassri norðan­átt. Þá mælist kannski ekki jafn mikið frost, en það bítur í vindinum. Þannig er það ein­mitt nú,“ segir Einar.

Hann segir að á höfuð­borgar­svæðinu á fimmtu­dag og föstu­dag verði um 6 til 7 stiga frost og vindur um 10 metrar á sekúndu. Í norðan­áttinni verði hvassast vestan Kvosarinnar og út á Sel­tjarnar­nesi og Álfta­nesi. „Þá heldur minna frost. Austar er aukið Esju­skjól, en meira frost á móti.“

Einar segir að á klukkan 12 á morgun, fimmtu­dag, sé gert ráð fyrir sjö stiga frosti og tíu metrum á sekúndu við Veður­stofuna. Það er frost sem jafn­gildir nærri 16 gráðum.

„Sé horft á vindinn saman með kulda loftsins þarf lík­lega að fara aftur til 2013 (4-6 des.) til að finna eitt­hvað sam­bæri­legt. Þá var vindur heldur hægari, en meira frost. "Kulda­g­æði" hins vegar svipuð. Mun kaldari til­vik má auð­veld­lega finna áður fyrr á árum s.s á milli 1965-1985,“ segir Einar og bætir við að ef til vill sé þörf á kulda­við­vörun þar sem dúða þarf leik­skóla­börn sér­stak­lega á fimmtu­dag og föstu­dag.

Aðrir úti við þurfi að huga að skjól­góðu höfuð­fati og hlýjum vetrar­skóm. Ullar­vett­lingar ættu líka að koma í góðar þarfir.

Veitur hafa virkjað við­bragðs­á­ætlun vegna kulda­kastsins sem er yfir­vofandi. Í til­kynningu sem fyrir­tækið sendi frá sér í morgun kemur fram að á­ætlunin gangi meðal annars út á að hvetja fólk til að fara spar­lega með heita vatnið svo öll hafi nægt vatn til hús­hitunar.

„Sé tekið mið af spá­líkönum, sem nýta veður­spár til að á­ætla notkun, er út­lit fyrir að hita­veitan á höfuð­borgar­svæðinu fari að þol­mörkum á föstu­dag og fram yfir helgi. Um 90% af hita­veitu­vatni er notað til hús­hitunar og því skiptir afar miklu máli að fólk sé með­vitað um hvernig nýta á það sem best,“ sagði í til­kynningunni.

Fólk er hvatt til að gera eftir­farandi:

• Hafa glugga lokaða
• Hafa úti­dyr ekki opnar lengur en þörf krefur
• Láta ekki renna í heita potta
• Stilla ofna svo þeir séu heitir að ofan en kaldir að neðan
• Varast að byrgja ofna, t.d. með síðum glugga­tjöldum eða hús­gögnum
• Minnka þrýsting á snjó­bræðslu­kerfum