„Mér finnst að menn sem gera svona við aðra eigi að fá að gjalda í sömu mynt“

Helgi Vil­hjálms­son, oft kenndur við Góu og faðir Hannesar Þórs sem var myrtur árið 2010, segir að þeir sem drepa eigi að gjalda í sömu mynt.

Ís­land í dag birtir í kvöld við­tal við Helga þar sem hann tjáir sig meðal annars um þá stað­reynd að maðurinn sem banaði syni hans gangi laus. Gunnar Rúnar Sigur­þórs­son var dæmdur í 16 ára fangelsi árið 2011 í Hæsta­rétti eftir að hafa verið dæmdur ó­sak­hæfur í héraðs­dómi.

Í síðustu viku var greint frá því í kvöld­fréttum Stöðvar 2 að Gunnari Rúnari hefði verið til­kynnt að hann mætti ekki mæta aftur til vinnu hjá Hafnar­fjarðar­bæ eftir að hafa unnið þar í þrjá daga. Gunnar Rúnar fór á Vernd í fyrra en eitt af skil­yrðum þess að fá að vera á Vernd og af­plána utan fangelsis er að vera í vinnu eða námi.

Guð­­mundur Ingi Þór­odds­­son, for­­maður fé­lags fanga, gagn­rýndi Hafnar­fjarðar­bæ harð­lega í við­tali við Stöð 2 og sagði hann það hafa gengið mjög erfið­­lega fyrir Gunnar Rúnar að fá vinnu. Hefur hann verið í sjálf­­boða­liða­vinnu og þegið fjár­hags­að­­stoð hjá Hafnar­fjarðar­bæ.

„Þetta er samt maður sem vill taka þátt í sam­­fé­laginu og koma betur út og byrja að borga skatta og ná að lifa og vera góður sam­­fé­lags­þegn. Hann fékk tæki­­færi til þess hjá Hafnar­fjarðar­bæ í síðustu viku en hann var búin að vinna í þrjá daga þegar honum var sagt upp,“ sagði Guð­­mundur Ingi.

Á Face­book-síðu Ís­lands í dag er birt til­vitnun í Helga þar sem hann segir: „Mér finnst bara að menn sem gera svona við aðra eigi að fá að gjalda í sömu mynt.“ Þetta er ekki í fyrsta sinn sem Helgi viðrar þá skoðun sína en það gerði hann einnig í við­tali við DV í fyrra­sumar.

„Ég hef mjög ein­falda skoðun á þessu. Það ætti að vera auga fyrir auga og tönn fyrir tönn. Ég hef bara þessa einu skoðun og þetta þyrftu menn þá að vita áður en þeir á­kveða að taka líf annarra. Menn sem hafa svona hugsunar­hátt þyrftu að geta vitað að ef þeir taka líf annarra þá verði líf þeirra líka tekið.“

Í fréttum Stöðvar 2 í síðustu viku sagði Guð­mundur Ingi að Hafnar­fjarðar­bær hefði gefið upp þá á­stæðu að kvartanir hefðu borist frá öðrum starfs­mönnum. Þeir vildu ekki vinna með honum. „Við teljum að það sé ó­líðandi árið 2020 að bæjar­fé­lag fari þannig fram með for­dómum, mis­munum og út­skúfun,“ segir Guð­mundur. Þá sagði hann að allir ættu rétt á öðru tæki­færi, sama hve al­var­legt brotið er.