Guðmundur Páll Jónsson, lögreglufulltrúi hjá lögreglunni á höfuðborgarsvæðinu segir að meirihluti tilkynninga sem lögreglan fái vegna þeirra sem neita að bera grímur í verslunum séu vegna þeirra sem eru undir áhrifum áfengis.
Þetta segir Guðmundur í samtali viðRíkisútvarpið í dag. Fréttir bárust af því í morgun að starfsmaður verslunar í miðbæ Reykjavíkur hefði orðið fyrir árás viðskiptavinar sem ekki vildi bera grímu, líkt og skylda er nú um mundir vegna heimsfaraldurs COVID-19.
„Þar kom maður án grímu inn í verslun. Hann var beðinn um að setja upp grímuna en neitaði því og brást illa við og ógnaði starfsmanni. Þannig að hann hringdi á lögreglu sem kom á staðinn. Við tókum niður allar upplýsingar um þennan mann, hann verður tekinn fyrir eftir helgi og á von á að greiða sekt. Ef hann greiðir ekki sektina þá fer þetta fyrir dómstólana,“ segir Guðmundur Páll í samtali við RÚV.
Hann segir lögregluna oft fá slíkar tilkynningar, um að starfsfólki sé hótað eða á það ráðist. Hann segir að meðal þeirra sem ekki vilja bera grímur sé fjölbreyttur hópur á öllum aldri.
„Að vísu er meirihlutinn karlar.“
