Verð í matvöruverslunum hefur í mörgum tilfellum hækkað umtalsvert síðan í febrúar en miklar verðhækkanir er að finna í flestum vöruflokkum. Mörg dæmi eru einnig um lækkun eða verð standi í stað. Áberandi er hækkun á hollustuvörum. Sem dæmi þá nemur verðhækkun á lýsi í helstu verslunum landsins frá 1,6 upp í 26,1%.Þetta kemur fram í könnun ASÍ.
Dýrir ávextir
Miklar verðhækkanir má finna í nær öllum vöruflokkum en í mörgum tilfellum lækkar verð einnig. Mestar verðhækkanir eru á brauði, kexi, snakki, pakkamat, bökunarvöru og öðrum þurrvörum ásamt dósamat og sósum en nokkuð algengt er að þessar vörur hækki um 10-20%.
Mestar hækkanir eru þó á ávöxtum og grænmeti og má í mörgum tilfellum sjá um eða yfir 50% verðhækkanir í þeim vöruflokki. Eitt dæmi um mikla hækkun var á Lýsi en 240 ml. flaska af þorskalýsi hækkaði í einni verslun um tvö hundruð krónur
Verðlagseftirlits ASÍ kannaði verð dagana 18. febrúar og 21. apríl 2020.
Þær verslanir sem samanburðurinn nær til eru Bónus, Krónan, Hagkaup, Nettó, Fjarðarkaup, Iceland, Kjörbúðin, Heimkaup.is og Netto.is.
