Mar­tröðin byrjaði eftir ferð til Ís­lands í janúar

„Ég er enn ekki viss hvort ég fékk CO­VID-19 á Ís­landi í janúar eða í London. En öll ein­kenni sem ég var með eftir Ís­lands­ferðina bentu til þess að þetta væri CO­VID-19,“ segir Ed Hornick, banda­rískur blaða­maður sem bú­settur er í London, í sam­tali við Hring­braut.

Ed greindist með CO­VID-19 í mars síðast­liðnum, eða tveimur mánuðum eftir að hann dvaldi á Ís­landi yfir langa helgi. Hann er í hópi þeirra sem glímt hafa við al­var­leg eftir­köst veirunnar; þrek­leysi, verið með verki fyrir brjósti og eins og hann hefur sjálfur lýst í skrifum sínum fyrir Ya­hoo News: „Eins og iP­hone-sími sem nær ekki meira en 50% hleðslu.“

Lagður inn nokkrum dögum eftir Íslandsheimsóknina

Í grein sem hann skrifaði fyrir Ya­hoo kemur fram að mar­tröðin hafi í raun byrjað eftir að hann dvaldi á Ís­landi í janúar­mánuði í nokkra daga.

Hann gekk upp á fjöll, heim­sótti Vík í Mýr­dal og laugar­daginn 18. janúar fór hann í Bláa lónið. Fimm dögum síðar, eða fimmtu­daginn 23. janúar, þegar Ed var kominn heim til Eng­lands, var hann lagður inn á Chelsea & West­min­ster-sjúkra­húsið í Lundúnum vegna veikinda. Var hann með verk í lungum og fyrir hjartanu og greindu læknar hann loks með lungna­bólgu og bólgu við hjarta­vöðva.

Ed bendir á að þetta hafi verið nokkuð áður en kórónu­veiran sem veldur CO­VID-19 komst í há­mæli og áður en far­aldurinn fór á flug í Evrópu og í Banda­ríkjunum. Hann segist hafa spurt lækna hvort þetta gæti verið þessi al­ræmda kórónu­veira, en læknar varla vitað hvað hann var að tala um. Ed hafði þarna fengið veður af veirunni í gegnum vinnu sína og velti hann því þar af leiðandi fyrir sér hvort hann hefði smitast þar sem ein­kennin bentu til þess.

Veiktist aftur illa í mars

Ed var heima næstu vikurnar þar sem á­stand hans varð betra, en í mars­mánuði veiktist hann aftur illa. Hann fékk háan hita, hósta, bein­verki, brjóst­verki, varð and­stuttur og þrek­laus. „Það var eins og ég væri að fá hjarta­á­fall í hvert skipti sem ég sneri mér í sófanum,“ sagði hann í grein sinni hjá Ya­hoo News.

Á þessum tíma­punkti var CO­VID-19-far­aldurinn kominn af stað fyrir al­vöru og hafði hann sam­band við lækni til að ganga úr skugga um að þetta væri ekki veiran al­ræmda. Læknirinn sendi heil­brigðis­starfs­mann heim til hans til að taka sýni fyrir kórónu­veirunni. Niður­staðan kom nokkrum dögum síðar og var hún nei­kvæð.

Ekki batnaði á­stand Eds og með hverjum deginum sem leið komu ný ein­kenni. Ed fékk að lokum nóg, fór á bráða­mót­töku sjúkra­hússins þar sem annað sýni var tekið. Það var þá sem hann greindist með CO­VID-19.

Eins og að framan greinir segir Ed að hann muni senni­lega aldrei vita hvað var að hrjá hann ná­kvæm­lega í janúar. Allt sé þetta dá­lítið skrýtið því hingað til hafi hann verið heilsu­hraustur. „Það getur vel verið að þetta hafi bara verið venju­leg lungna­bólga og bólgur í hjarta. En það hefur aldrei komið fyrir mig áður svo mér finnst það dá­lítið skrýtið,“ segir hann.

Langsótt að veiran hafi verið komin á kreik í janúar

Þór­ólfur Guðna­son sótt­varna­læknir sagði í ágúst­mánuði að engin þekkt dæmi væru um að þeir sem smitast hafa af CO­VID-19 og náð bata hafi smitast aftur. Miðað við það er ó­senni­legt að Ed hafi komst í snertingu við veiruna hér á landi í janúar miðað við veikindin sem helltust svo yfir hann í mars­mánuði. Sjálfur segist Ed þó telja að veiran hafi verið mun fyrr á ferðinni en hingað til hefur verið talið.

„Ég held að veiran hafi verið farin að dreifa sér fyrir al­vöru í desember,“ segir hann og bendir á að hann hafi séð marga kín­verska ferða­menn hér á landi í janúar­mánuði, en eins og kunnugt er greindist veiran fyrst í kín­versku borginni Wu­han í desember.

Í sam­tali við blaða­mann sagði Þór­ólfur Guðna­son það ó­senni­legt að veiran hafi verið komin til Ís­lands í janúar. „Það er ó­mögu­legt að segja en ég tel það ó­senni­legt. Það voru tekin mörg sýni hér á landi í byrjun febrúar og fram undir miðjan febrúar en það greindist ekki neinn. Þannig að mér finnst það vera frekar lang­sótt, en auð­vitað veit maður það ekki.“

Í sam­tali við 13 WHAM, staðar­miðil í Rochester í New York-ríki, segist Ed vilja fá sitt eðli­lega líf aftur. Nú, mörgum mánuðum eftir að CO­VID-smit var stað­fest, hafi hann varla orku til að fara fram úr rúminu, hvað þá að fara út til að viðra hundinn.

„Mér líður eins og ég sé átt­ræður. Maður þarf ekki að vera gamall eða heilsu­veill til að fá al­var­lega fylgi­kvilla þessarar veiru.“