Í fyrra fór frystitogarinn Júlíus Geirmundsson á Ísafirði í sögulega sjóferð en af 25 manna áhöfn reyndust allir nema þrír hafa smitast af Covid þær rúmu þrjár vikur sem skipið hafði verið á sjó.
Stundin hefur nú gert ítarlega greiningu á málinu sem birtist í nýjasta tölublaði Stundarinnar.
Þar kemur meðal annars fram að margir lágu illa haldnir jafnvel svo dögum skipti en á meðan hafi félagar þeirra reynt að halda vinnslunni um borð gangandi, veikir.
Frásagnir af raunum skipverjanna vöktu hörð viðbrögð á sínum tíma en fregnir bárust hratt af veikum mönnum við vinnu eða liggjandi á bekkjum sem eins og Stundin segir að hljómaði eins úr 19. aldar leikriti.
„Það tók mig langan tíma að átta mig á skömminni sem maður burðaðist með eftir þetta,“ segir Kjartan Ágúst Pálsson, sem var matsmaður í umræddum túr í samtali við Stundina. „Að maður skuli hafa leyft þeim að koma svona fram við sig. Fyrst á eftir upplifði maður sig eins og einfeldning að hafa látið fara svona með sig. Það tók mig langan tíma að ná mér af þeirri skömm.“ Kjartan glímir enn við afleiðingar veikindanna.
Í huga annars er skýrt að líf hans var ekki það mikilvægasta um borð.
„Maður er auðvitað enn á fullu að vinna úr þessu,“ segir Bjarki Birgisson, fyrrverandi Baadermaður á Júlíusi Geirmundssyni. „Það er auðvitað helvíti harkalegt að segja það en þarna voru einfaldlega peningar settir ofar mannslífum, það er ekki hægt að komast að annarri niðurstöðu.“
Hægt er að lesa ítarlega úttekt Stundarinnar um „Martröðina á Júllanum“ hér.
