Marta vill að útlendingar á Íslandi leggi það á sig að læra íslensku

„Þegar ég horfi á svona fréttir þá virkar það á mig sem fyrir­sláttur við­mælenda sem koma fram, tala á ensku og ætlast til þess að verða settir jafn­fætis fólki sem talar ís­lenskt mál. Við búum á Ís­landi og hér er ís­lenskt mál þjóð­tunga landsins.“

Þetta segir Marta Ei­ríks­dóttir ís­lensku­kennari í at­hyglis­verðum pistli sem birtist á vef Vísis í morgun.

Í pistlinum fjallar hún um út­lendinga og ís­lenskt mál og bendir á að þegar hún bjó í Dan­mörku hafi hún lagt sig fram um að tala dönsku. „Bæði vegna þess að ég vissi að ég næði betra sam­bandi við fólkið sem bjó í landinu og einnig af virðingu við Dani og móður­mál þeirra. Námið sem ég stundaði var ó­hefð­bundið list­nám og ekki láns­hæft á þeim tíma, þess vegna þurfti ég einnig að vinna með náminu. Að kunna og geta talað dönsku hjálpaði mér að fá hluta­starf.“

Marta segir að það sama hafi verið uppi á teningnum þegar hún flutti til Noregs löngu síðar. Hún hafi ekkert kunnað í norsku og orðið sér út um kennslu­efni á norsku áður en hún fór til að geta undir­búið dvölina í Noregi betur.

„Ég vissi að ef mér átti að líða vel í Noregi og eiga meiri mögu­leika á að fá at­vinnu þar, þá þyrfti ég að leggja það á mig að læra og tala norsku. Ég var gestur í landinu þeirra. Það var því ekki hlut­verk þeirra Norð­manna að mæta mér í enskri tungu, hvað þá á ís­lensku, nei ég talaði norsku í Noregi.“

Marta segist hafa fylgst með fréttum að undan­förnu þar sem fólk af er­lendum upp­runa kemur fram.

„Fólk sem fær ekki at­vinnu hér á landi og kvartar undan for­dómum Ís­lendinga gagn­vart út­lendingum. Þeir á­saka fyrir­tækin um for­dóma og segja Ís­lendinga frekar fá at­vinnu. Sumir hafa búið hér í nokkur ár en tala ensku á meðan aðrir tala á­gætis ís­lensku.“

Hún bendir á að at­vinnu­leysi sé hjá mörgum er­lendum í­búum á Ís­landi en það sé einnig stað­reynd hjá þeim sem fæddir eru hér á landi.

„Það getur verið krefjandi að læra er­lent tungu­mál, það vitum við mörg. En til þess að eiga meiri mögu­leika á að fá at­vinnu hér á landi, þá verður fólk af er­lendum upp­runa, að leggja það á sig að læra ís­lensku.“

Marta segir að tungu­mál þjóðarinnar sé á­vallt lykillinn að því að að­lagast betur í landinu þar sem við­komandi býr og það skapi fleiri tæki­færi. „Ef þú vilt breyta ein­hverju við­horfi hér, þá er lík­lega best að byrja á því fyrst, að að­lagast þjóðinni og landinu, en ekki að það að­lagist þér. Það þurfa allir að sanna sig í upp­hafi.“

Sjálf segir Marta að henni sé ná­kvæm­lega sama hvort ein­stak­lingur sem er af er­lendu bergi brotinn þjóni henni á veitinga­húsi eða af­greiði hana úti í búð. „En að ég fái að tala ís­lensku á Ís­landi þykir mér yndis­legt.“