Margrét glímir enn við eftir­köst CO­VID-19: Það versta er að vita ekki hvað er að

Margrét Gauja Magnús­dóttir, leið­sögu­maður og fyrr­verandi bæjar­full­trúi í Hafnar­firði, greindist með CO­VID-19 í mars síðast­liðnum. Þó að brátt séu liðnir tveir mánuðir frá smitinu glímir Margrét enn við eftir­köstin og kom það ber­lega í ljós á dögunum þegar hún hugðist ganga upp á Helga­fell.

Margrét sagði frá því í færslu á Face­book á laugar­dag að hún hefði, að ráði sjúkra­þjálfara, átt að ganga að Helga­felli, fara 30% upp­fellið og svo til baka. Margrét var til­búin í slaginn og full til­hlökkunar að reima á sig skóna og arka af stað.

„En nei, í gær sagði líkami minn hingað og ekki lengra og fann, mjög svo skelkaður, ná­granni mig ælandi útí garði á fjórum fótum, grenjandi um að ég væri að kafna,“ segir Margrét í færslunni en hún tjáði sig einnig um málið í sam­tali við DV í gær.

„Áður en þetta gerðist á föstu­daginn var ég búin að eiga fjórar nokkuð góðar vikur, mis­orku­mikil eftir dögum, stundum haus­verkur, en ég hafði ekki veikst svona allan þann tíma. Ég er hjá sjúkra­þjálfara tvisvar í viku og gengur vel og svo er ég í fjar­tímum í öndunar­jóga, einka­tímum hjá vin­konu minni. Í rauninni gengur þetta vel og ég er að gera allt rétt, að ég held,“ sagði hún við DV.

Í færslunni og í við­talinu tók hún fram að hún væri ekki að óska eftir vor­kunn eða stuðningi. Hún hafi sterkt bak­land en hafi orðið vör við það að þeir sem glíma við eftir­köst CO­VID-19 upp­lifi sig eina

„Ef það eru fleiri en 1800 manns sem fengu þessa greiningu hér á landi þá eru örugg­lega fleiri en ég í þessum sporum. Ef ein­hver þeirra lesa þetta þá vita þau að þau eru ekki ein og þau eru ekki geð­veik. Ég hringdi buguð í co­vid-deildina á föstu­dags­kvöld og grenjaði bara, af því ég skil þetta ekki. Ég er gamall náttúru­fræði­kennari og ég vil fá að vita hvað er að mér. Mér var hálf­partinn bent á að tala við sál­fræðing. En ég er í mjög góðu and­legu jafn­vægi og þarf ekki sál­fræðing út af þessu,“ sagði hún við DV en tók fram að ís­lensk stjórn­völd ættu allt hrós skilið fyrir það hversu harka­lega var tekið á veirunni. Þá hafi hún fengið af­bragðs­þjónustu meðan á veikindunum stóð.

Við­tal DV við Margréti Gauju.