Margrét Friðriksdóttir, ritstjóri vefsíðunnar Fréttin.is, mætti á sinn fyrsta upplýsingafund almannavarna í gær. Margrét hefur vakið athygli fyrir efasemdir sínar um Covid-19 og bólusetningar gegn veirunni. Sitt sýnist hverjum um málflutning hennar.
Hún hefur reynt að smitast af Covid-19 en án árangurs – enn sem komið er – eins og fram hefur komið hér á vef Hringbrautar.
Margrét er í viðtali í Fréttablaðinu í dag þar sem hún segist vera að finna sig vel í nýju hlutverki og hún kveðst bara vera rétt að byrja.
„Já, ég mun mæta á alla upplýsingafundi hér eftir,“ segir hún og bætir við að henni lítist ágætlega á að fá viðurnefnið Magga á Fréttinni með vísan til Björns Inga á Viljanum.
Aðspurð hvort hún sé ekki að verða efni í einhvers konar grínskets, í ljósi þess að hún hefur reynt að smitast af veirunni en án árangurs, segir hún:
„Mér hefði fundist þetta æðislegt í skaupið. Konan sem getur ekki smitast af Covid og sýna mig sleikja handföngin á innkaupakerrum og diska inni á Covid-deildinni sem ég hefði náð að smygla mér inn á. Það hefði verið hrikalega fyndið,“ segir hún.
