Fjölmiðlakonan burlesk dansarinn, Margrét Erla Maack, segir íslenska öryggisverði á Keflavíkurflugvelli mun meira vakandi en kollegar þeirra á Heathrow en hins vegar sé full langt gengið á köflum.
„Eitt sinn var ég á burlesk-sýningarferðalagi. Ein í hópnum var með stórkostlegt Ron Burgundy-atriði, þar sem hún var klædd í vínrauð föt, með hárkollu og yfirvararskegg og fækkaði fötum á sama tíma og hún spilaði á þverflautu. Í lokin kom eldur úr þverflautunni. Atriðið fékk mikil hlátrasköll og standandi lófaklapp,“ skrifar Margrét í pistli í Fréttablaðinu.
„Á heimleiðinni, í biðröð í öryggisleit, segir dansmærin: „Fokk stelpur. Ég er með dínamítbómullina í þverflaututöskunni!“ Sem betur fer tók einhver þverflaututöskuna og opnaði hana, en spurði ekki út þennan sakleysislega flóka, hélt líklega að þetta væri þverflaututvistur. Dansmærin fór því með dínamítið í handfarangri og náði að skila restinni til töframannsins.“
„Mér varð hugsað til þessarar sögu á ferðalagi í sumar. Barnið mitt verður pirrað og erfitt í flutningum ef hún er svöng, svo með mæðratips-viskunni pakkaði ég ávaxta- og skyrskvísum í handfarangur. Íslensku öryggisverðirnir eru mun meira vakandi í vinnunni en kollegar þeirra á Heathrow. Ég mátti fara með ávaxtaskvísurnar í gegn, því þær væru barnamatur en alls ekki skyrskvísurnar. „Það er hægt að kaupa skyr inni,“ sagði ung kona, sem var einfaldlega að sinna sínu starfi,“ skrifar Margrét.
„Vissulega var hægt að kaupa skyr í brottfararsalnum, en ekki í þessum handhægu barnvænu umbúðum, að minnsta kosti fann ég þær ekki á sama tíma og ég var að passa að týna ekki tveggja og hálfs árs dínamítsprengjunni minni. Ég held ég tali fyrir hönd allra foreldra þegar ég segi: Umbúðirnar gera þetta að barnamat, ekki innihaldið. Ég er þakklát fyrir að öryggisverðir sinni sínu starfi. En kommon!“ skrifar Margrét að lokum.
