„Mér finnst pólitík að mörgu leyti skemmtileg. Það er áhugavert að fá að takast á um hugmyndir og skipuleggja framtíð heillar borgar,“ segir Logi Bergmann Eiðsson, fjölmiðlamaður til margra ára, í grein sinni í sunnudagsblaði Morgunblaðsins um helgina.
Þar tjáir Logi sig um orðróm þess efnis að hann ætli að gefa kost á sér fyrir borgarstjórnarkosningarnar næsta vor. Nafn Loga hefur skotið upp kollinum í umræðunni undanfarna mánuði en það stefnir allt í spennandi kosningar í borginni. Í pistli sínum segir Logi að fjölmargir hafi komið að máli við hann að undanförnu og hvatt hann til að bjóða sig fram.
„Fyrir nokkrum árum var stofnuð síða á Facebook sem hét: Persónulegt framboð Loga Bergmanns til borgarstjóra. Voða sniðugt grín en það virðist hafa komið þessari hugmynd að hjá fólki að ég væri einmitt maðurinn til að standa í þessu. Og ef ekki ég þá ástkær eiginkona mín.“
Logi viðurkennir að hann hafi hugsað um þetta í smá stund. „Mátaði mig í huganum að stíga á svalirnar við ráðhúsið og horfa yfir veldi mitt. Klippa á borða og dusta rykið af hugmyndum um golfvöll í Viðey. Og gott ef ég skrifaði ekki líka pistil um þetta í blaðið mitt. En svo sneri ég aftur að raunveruleikanum og ákvað að þetta myndi ég aldrei gera. Það hefur sem sagt ekki breyst.“
Logi segir að margir hafi talað við hann um þetta.
„En það kemur ekki í veg fyrir að í hverri viku nefni einhver þetta við mig, oft bláókunnugt fólk sem hringir eða sendir mér skilaboð. Vænsta fólk sem finnst geggjuð hugmynd að ég gangi í málið og mér þykir í raun og veru vænt um að það sýni mér þetta traust. Flestir hafa hugsað þetta raunsætt og benda mér á að ég þurfi að fara að spá í framboðsmál og undirbúa mig. Einn og einn virðist svo halda að ég geti bara mætt í ráðhúsið og sagt: Jæja, hvar er skrifstofan mín?“
Logi segir að pólitík sé að mörgu leyti skemmtileg en hann getur ekki ímyndað sér að það sé gaman að starfa í borgarmálunum.
„Í grunninn er borgin eins og stórt húsfélag. Það þarf að takast á um ýmis mál. Á að fá menn til að þvo gluggana? Hvernig eiga jólaskreytingarnar að vera og hvenær eiga þær að fara upp? Eigum við að setja upp hleðslustöð og hvar á hún þá að vera? Þarf ekki að setja nýtt teppi á stigaganginn? Hvað eigum við að borga mikið í hússjóðinn á mánuði? Bara svona þetta helsta sem venjuleg húsfélög þurfa að eiga við. Sinnum tíu þúsund,“ segir Logi og bætir við að þetta húsfélag, það er borgin, sé í frekar vondum málum.
„Þrátt fyrir allt þetta eru borgarmál mér hjartans mál eins og ég held að eigi við um flest okkar sem búum í Reykjavík. En þetta virkar bara alltof leiðinlegt, tímafrekt og óskilvirkt fyrir fólk sem hefur það markmið í lífinu að leita ekki uppi leiðindi. Svo ég segi bara eins og mamma: Já takk, en nei takk.“
