Tónlistarmaðurinn Margeirs Sveinsson sem lenti í því að ökumaður reyndi að keyra hann niður viljandi í miðbæ Reykjavíkur meðan hann var að hjóla er ekki sáttur með viðbrögð lögreglunnar í málinu.
„Hvar annars staðar en á Íslandi fær maður sem ekur um á tveggja tonna drápstæki og er viljugur til þess að keyra óvarða vegfarendur niður viljandi að ganga laus? Engin tilkynning komin að það sé þó amk búið að svipta viðkomandi ökuréttindunum,“ skrifar Margeir á twitter og taggar lögregluna í færslunni.
Fréttablaðið greindi frá því í vikunni að lögreglan sé ekki að rannsaka málið sem umferðaróhapp heldur líkamsárás.
Nei, þetta snýst víst bara um að sýna hvoru öðru meiri tillitssemi. pic.twitter.com/5jL3N32Fzr
— Margeir (@margeir) June 10, 2022
Í samtali við DV á mánudaginn sagði Margeir frá árásinni en hann var hjólandi milli tveggja bíla þegar hann varð var við að ökumaður aftari bílsins fór að þenja bílinn í augljósum pirringi.
„Ég var á ágætis hraða og var ekki að tefja hann með neinum hætti. Fyrir framan mig var auk þess annar bíll þannig að hann hafði ekki komist leiðar sinnar þó að ég hefði vikið,“ segir Margeir.
Ökumaðurinn keyrir síðan aftan á hjól Margeirs þannig að hann hentist af hjólinu og í götuna. „Mér brá náttúrulega verulega en náði svo áttum, stóð upp og gekk að bílnum til að ræða við ökumanninn og hvað honum hefði gengið til,“ segir Margeir.
Ökumaðurinn gaf þá í og keyrði yfir hjól Margeirs til að komast leiðar sinnar. Þar sem allir vegir voru honum lokaðir keyrði hann inn göngugötuna á Laugaveginum til að komast undan.
