Már Kristjánsson, yfirlæknir á smitsjúkdómadeild Landspítalans, segir að mjög skiptar skoðanir séu um það innan heilbrigðiskerfisins að opna landið fyrir ferðamönnum á nýjan leik.
Millilandaflug hefur nánast legið niðri með öllu síðustu vikur vegna COVID-19 faraldursins. Í síðustu viku ákváðu stjórnvöld þó að opna landamærin frá og með 15. júní en þó með ákveðnum takmörkunum. Þeir ferðamenn sem koma til landsins, bæði innlendir og erlendir, þurfa að gangast undir skimun við komuna til landsins eða framvísa vottorði.
Már ræddi málið við Morgunvaktina á Rás 1 í morgun og þar sagði hann að margir væru hugsi vegna þessa. „Margir af mínum kollegum eru mjög hugsi um þetta og jafnvel reiðir að þetta skuli vera gert,“ segir hann.
Þórólfur Guðnason sóttvarnalæknir lét hafa eftir sér að loknum blaðamannafundi í síðustu viku að tímapunkturinn til að opna landamærin væri núna á meðan ferðmannastaumurinn er lítill. „Þannig getum við reynt af fremsta megni að vernda okkar íbúa og fylgst betur með hvernig þetta gengur. Mér finnst þetta skynsamleg ákvörðun og í takt við það sem ég hef verið að segja.“
Már sagði við Morgunvaktina, að því er segir í frétt RÚV um málið, að tíminn eigi eftir að leiða í ljós hversu farsæl ákvörðun þetta verður. Viðbrögð fólks séu til marks um ótta að við gætum hugsanlega verið að kalla yfir okkur hörmungar.
„Sem kann að vera að við séum að gera í ljósi þess sem við þekkjum utan úr heimi, þar sem samfélög fóru hryllilega illa út úr þessu. Við virðumst hafa sloppið fyrir horn enn þá alla vega. Mér finnst þetta vera réttmæt tilfinning hjá fólki að þetta muni kannski verða eitthvað hræðilegt tímabil. Það er alveg skiljanlegt,“ sagði Már sem sagði jafnframt mikilvægt að setja okkur í stellingar og vera undirbúin. Þannig verði reynt að draga úr hugsanlegum áhrifum eins og kostur er.
