„Getum við átt vitsmunalegar umræður um það af hverju það eru 11 konur og 2 karlar i starfshóp um kynfræðslu?“
Þessari spurningu varpaði Þorkell Máni Pétursson útvarpsmaður fram á Twitter-síðu sinni í gær.
Máni vísaði þar í fréttir um skipun starfshóps sem hafa það hlutverk að efla kynfræðslu í grunn- og framhaldsskólum.
Sólborg Guðbrandsdóttir, fyrirlesari og stofnandi Instagram-síðunnar Fávitar, leiðir hópinn sem mun skila skýrslu og aðgerðartillögum fyrir lok febrúarmánaðar næstkomandi. Mun starfshópurinn meðal annars gera tillögur um hvernig sé best að miðla fræðslu um kynlíf og kynheilbrigði.
Í Twitter-þræðinum segist Sólborg sjálf ekki hafa komið að skipun hópsins, en þær stofnanir sem beðnar voru um að tilnefna í hópinn séu að miklu leyti kvennastéttir, til dæmis kennarar, hjúkrunarfræðingar og kynfræðingar.
„Karlmenn taka síður þátt í jafnréttisbaráttunni og það er ekki vegna þess að þeir eru ekki velkomnir með,“ segir hún.
Máni er þeirrar skoðunar að opna hefði átt nefndina fyrir fleirum. „Ég held að karlmenn þurfi ef eitthvað er meiri kynfræðslu en konur. Typpi valda meiri skaða í þessu samfélagi en sköp.“ Sólborg kveðst taka undir það og segist vera opin fyrir því að funda með „áhugasömum typpaeigendum“ sem hafa eitthvað til málanna að leggja.
Í tilkynningu sem stjórnarráðið sendi frá sér vegna hópsins á þriðjudag kemur fram að konur séu í meirihluta af einfaldri ástæðu. Ítrekaðar tilraunir hafi verið gerðar til að jafna kynjahalla en án árangurs. Máni virðist ekki kaupa þessa skýringu.
„Já, þetta er ekki trúverðugt. Eru sem sagt allir karlar vanhæfir eða áhugalausir nema þessir tveir.“
Umræðuna má sjá í Twitter-þræðinum hér að neðan:
Getum við átt vitsmunarlegar umræður um það afhverju það eru 11 konur og 2 karlar i starfshóp um kynfræðslu? Hver vill byrjar?
— Máni Pétursson (@Manipeturs) December 16, 2020
