Heimsmeistaramótið í knattspyrnu var flautað í gang í gær þegar heimamenn í Katar töpuðu 2-0 fyrir spræku liði Ekvador í fyrsta leik mótsins.
Sú ákvörðun að halda mótið í Katar hefur verið umdeild í meira lagi en mannréttindamál þykja fótum troðum í ríkinu og þá létust margir verkamenn við að byggja þá velli sem spilað er á. Allir leikir mótsins verða í beinni útsendingu á RÚV og hefur þó nokkur gagnrýni beinst að ríkisfjölmiðlinum vegna þess.
Þorkell Gunnar Sigurbjörnsson, íþróttafréttamaður á RÚV, steig fram á Twitter í gær og svaraði þar fyrir þá gagnrýni sem RÚV hefur fengið. Benti hann á að ákveðins tvískinnungs gætti í umræðunni.
„Auðvitað gagnrýnum við mannréttindabrot og spillingu tengdu HM í Katar, sem hefði aldrei átt að fara fram þar. En hvar var samt þessi gagnrýni á Rússland fyrir HM 2018? Rússar höfðu þá innlimað Krímskaga með hervaldi. Þar er hinsegin fólk fangelsað og rasismi viðgengst á völlunum.“
Þorkell Gunnar bætti svo sjálfur við að vissulega hefði einhver gagnrýni komið fram þegar mótið var haldið í Rússlandi. „En þar hótaði fólk ekki í stórum stíl að sniðganga og þar fram eftir götunum. Of gaman því Ísland var með? Kannski hefur siðferðisvitund fólks bara batnað síðan þá. Skal ekki segja.“
Útvarpsmaðurinn Þorkell Máni Pétursson blandaði sér í umræðuna en hann er þekktur fyrir flest annað en að liggja á skoðunum sínum.
„Þetta er á öðrum skala. Alveg sorglegt að ríkistjórnarsjónvarpið sé að reyna að hagnast á þessu. Við sem höfum einhverja sómakennd getum ekki einu sinni sagt þessu upp.“
Þorkell Gunnar svaraði að bragði að honum dytti ekki í hug að mótmæla því að þetta væri á öðrum skala.
„Hef hvergi varið þá ákvörðun að HM sé í Katar. Hvað RÚV á auglýsingamarkaði varðar veistu vel að það eru umræður sem þú þarft að taka við þingmenn sem setja íslensk lög, en ekki við mig almennan starfsmann hjá RÚV.“
Auðvitað gagnrýnum við mannréttindabrot og spillingu tengdu HM í Katar, sem hefði aldrei átt að fara fram þar. En hvar var samt þessi gagnrýni á Rússland fyrir HM 2018? Rússar höfðu þá innlimað Krímskaga með hervaldi. Þar er hinsegin fólk fangelsað og rasismi viðgengst á völlunum
— Þorkell Gunnar Sigurbjörnsson (@thorkellg) November 20, 2022
